Մեծ Բրիտանիայում ՀՀ դեսպան Վարուժան Ներսեսյանը մասնակցեց Եվրասիական երկրների Անկախության 30-ամյակի տոնակատարությանը։ Միջոցառումը կազմակերպել էր ՄԹ խորհրդարանի «Եվրասիայի պահպանողական ընկերներ» կազմակերպության կողմից՝ Լենսդաուն ակումբում։ Ակումբի գլխավոր տնօրեն և քարտուղար Դեյվիդ Հերբերթը ջերմորեն ողջունեց միջոցառման մասնակիցներին Լենսդաունում, որտեղ նրանք ունեին առանձին տաղավարներ, որոնք ներկայացնում էին իրենց պատմությունը, մշակույթը, խոհանոցը և ազգային խորհրդանիշները:
Հայկական տաղավարում ներկայացված էին հայկական հարուստ մշակույթն ու պատմությունը, համեղ քաղցրավենիքներն ու հայկական գինին ու կոնյակը։ Մասնակից երկրներին և հյուրերին ողջունեցին Մեծ Բրիտանիայի Եվրոպայի և Ամերիկայի հարցերով նախարար Վենդի Մորթոնը, «Եվրասիայի պահպանողական ընկերներ» կազմակերպության նախագահ Լորդ Փիթեր Լիլլին և կազմակերպության խոսնակ տիկին Բոտա Տորե Հոփկինսոնը: Հյուրերի շարքում էին ՄԹ-ՀՀ բարեկամական խմբի ղեկավար, Պահպանողական կուսակցության անդամ Թիմ Լոութոնը, ՄԹ-ՀՀ բարեկամական խմբի փոխնախագահ Մարկ Փրիթչարդը, ՄԹ խորհրդարանի այլ անդամներ, դեսպաններ և դիվանագետներ, Եվրասիական երկրների Միացյալ Թագավորության համայնքների ներկայացուցիչներ և բարեկամներ, գործարարներ։
