«Գիտեք՝ Թոքաբանության ազգային կենտրոնում էլ մարդիկ են աշխատում և հիվանդանում են, անգամ կարմրուկով: Չեմ հասկանում դեպքի սկանդալային երանգները»:
Այս մասին լրագրողների հետ ճեպազրույցի ժամանակ ասաց առողջապահության նախարար Անահիտ Ավանեսյանը՝ արձագանքելով հարցին, թե Թոքաբանության ազգային կենտրոնում կարմրուկի դեպք է արձանագրվել, երկու բուժաշխատող է վարակվել, ի՞նչ է տեղի ունեցել, և ինչպե՞ս է այդտեղ կարմրուկ արձանագրվել:
«Այո, 2 բուժաշխատող հիվանդացել է և բուժվել»,- ասաց Ավանեսյանը:
Դիտարկմանը, թե իր դեմ հերթական հայցն է ներկայացվել, այս անգամ՝ Դատաբժշկական գիտագործնական կենտրոնի նախկին տնօրենը, ինչպե՞ս կմեկնաբանի, Ավանեսյանն ասաց. «Չեմ մեկնաբանում, մարդն օգտվել է դատարան դիմելու իր իրավունքից, դիմել է, Դատաբժշկական գիտագործնական կենտրոնն ունի տնօրենի նոր պաշտոնակատար, կարծում եմ՝ նա շուտով հայցը հետ կվերցնի»:
Լրագրողի դիտարկմանը, թե մի առիթով ասել է, որ լավ նախարար է, շարունակո՞ւմ է այդ պնդումն անել, նախարարը պատասխանեց. «Այո, հենց փոխեմ իմ եզրահանգումը, հրաժարական կտամ»:
Խոսելով հուլիսի 12-ի ցուցարարների՝ ոստիկանների հետ բախման հետևանքով տուժածների մասին՝ Ավանեսյանը նշեց, որ ունեցել են ընդամենը մի պացիենտ, որ վիրահատական միջամտություն է իրականացվել, որը բարեհաջող է ընթացել, այժմ պացիենտը ապաքինման շրջանում է: