Հանրային ծառայությունները կարգավորող հանձնաժողովի նախագահ Գարեգին Բաղրամյանը անդրադարձել է Արզնի ջրատարի մեծ վթարին, նշել, որ որոշվել է գետով անցնող խողովակը փոխարինել:

Բաղրամյանը նաև անդրադարձել է մայրաքաղաքում հաճախակի ջրանջատումներին՝ նշելով՝ դրանք ոչ թե ջրանջատումներ են, այլ «Վեոլիա ջուրը» իրականացնում է գրաֆիկի փոփոխություններ: Ըստ նրա՝ կարող են լինել հատվածներ, որ 24 ժամը կրճատվի՝ իջեցվելով մինչև 19 կամ 17 ժամի, քանի որ առկա է ջրաղբյուրների ջրաքանակի նվազում:

«Կա մի մեծ, գլոբալ խնդիր, որ մոտավորապես 20-30 տոկոս ընդհանուր ջրաղբյուրների ջրաքանակի նվազում ունեն, և այդ հարցերն էլ գլոբալ քննարկվում են՝ հիմա այլ ջրաքանակներով կամ լրացուցիչ ջրաքանակ քաղաք հասցնելու հնարավորություն ստեղծելու ուղղությամբ։ Քաղաքացիների ահազանգերը, բողոքները ուսումնասիրվում են։ Օրինակ՝ 3 օր ջուր չունենալը կանոնների խախտում է: Ընկերությունը առնվազն համապատասխան ջրաքանակ պետք է ապահովեր, եթե ոչ ցիստեռների միջոցով: Եթե դա չի արվել, խախտվել են կանոնները»,- նշել է նա։

Նրա խոսքով՝ այս պահին պայմանագրի լավարկման և որոշակի ջրաքանակով Երևան մտնող ջրաքանակի լավացման մասով քննարկումներ են ընթանում։ Ընկերությունը որպես վարձակ է հանդիսանում և խոշորամասշտաբ ու մեծ ծավալի ներդրումների իրավունք չունի, իսկ ենթակառուցվածքում պահանջվող ներդրումները պետք  իրականացվեն կա՛մ պետության, կա՛մ որոշակի արտոնյալ վարկերի ներգրավվման հնարավորությամբ։