Գյումրու Սուրբ Ամենափրկիչ եկեղեցու բակն այսօր կրկին մարդաշատ էր, օդը՝ խնկաբույր: 1988 թվականի դեկտեմբերի 7-ի երկրաշարժի 33-րդ տարելիցի կապակցությամբ ծաղիկներ խոնարհվեցին, հնչեց տերունական աղոթք:
Հիշատակի արարողությանը, ի թիվս այլ անձանց, մասնակցեց ՀՀ փոխվարչապետ Համբարձում Մաթևոսյանը:
«1988 թվականի դեկտեմբերի 7-ի աղետից 33 տարի անց Գյումրիում չսպիացող վերքեր ու բազմաթիվ չլուծված խնդիրներ կան: Իշխանությունը հանձնառու է դրանց վերացման հարցում: Այս 3 տարիների ընթացքում Շիրակի մարզում 8 մլրդ դրամի սուբվենցիոն ծրագիր է իրականացվել, որի 60 տոկոսը բյուջեի հաշվին է կատարվել: Դրանց մեջ և՛ փողոցաշինություն կա, և՛ կենսական նշանակության տարբեր աշխատանքներ: Այսօր պետք է մեկ անգամ ևս պարտավորվենք օր առաջ լուծել Շիրակում ծառացած խնդիրները, հատկապես՝ երկրաշարժի հետևանքով առաջացած»,- լրագրողների հետ զրույցում ասաց փոխվարչապետը:
Համբարձում Մաթևոսյանը նաև վստահեցրեց, որ Գյումրիում կշարունակվի բնակապահովման ծրագրերի իրականացումը:
Սուրբ Ամենափրկչի բակում տեղադրված կոթողին ծաղիկներ խոնարհեցին նաև Շիրակի մարզպետ Նազելի Բաղդասարյանը, Գյումրու համայնքապետ Վարդգես Սամսոնյանը, ԱԻ փոխնախարար Արմեն Փամբուխչյանը, նախարարության այլ ներկայացուցիչները, բազմաթիվ գյումրեցիներ և այլք:
