Արդարադատության նախարարի տեղակալներ Քրիստիննե Գրիգորյանի և Արմեն Հովհաննիսյանի մասնակցությամբ դեկտեմբերի 21-ին տեղի է ունեցել Անչափահասների արդարադատության խորհրդի 2021 թվականի ամփոփիչ նիստը, որը կազմակերպվել էր Հայաստանում ՅՈՒՆԻՍԵՖ-ի հետ իրականացվող «Բռնության կանխարգելման միջոլորտային ինստիտուցիոնալ ենթակառուցվածքների զարգացում՝ հիմնված երեխայազգայուն և գենդերային զգայուն մոտեցումների վրա» ծրագրի շրջանակում:
ՀՀ ԱՆ տեղեկատվության և հասարակայնության հետ կապերի վարչությունից հայտնում են, որ նախարարի առաջին տեղակալ Քրիստիննե Գրիգորյանը, իր խոսքում կարևորելով Խորհրդի գործունեությունը, շնորհավորել է Խորհրդի անդամներին «Անչափահասի, անգործունակի կամ հոգեկան առողջության խնդիր ունեցող անձի, ընտանեկան բռնության գործերով քննչական գործողության կատարմանը ներգրավվող հոգեբանների վերապատրաստում» դասընթացի հաջող իրագործման կապակցությամբ՝ նշելով այն որպես առաջընթաց և ընդգծելով, որ Անչափահասների արդարադատության խորհրդի հետագա գործողությունները ևս պետք է լինեն նպատակային և արդյունավետ:
Հայաստանում ՅՈՒՆԻՍԵՖ-ի Անչափահասաների արդարադատության ծրագրի համակարգող Վիկտորյա Օհանյանը, իր խոսքում կարևորելով Խորհրդի գործունեությունը, նշել է, որ Խորհուրդն այլևս կախված չէ միջազգային գործընկերների աջակցությունից, ինչը նշանակում է, որ մեր պետությունն իր վրա է վերցրել հանձնառությունն առաջ տանելու երեխայի համար մատչելի, երեխայակենտրոն արդարադատության և երեխաներին բռնությունից պաշտպանելու օրակարգը:
ՄԱԿ-ի Բնակչության հիմնադրամի հայաստանյան գրասենյակի ղեկավար Ծովինար Հարությունյանն իր հերթին շնորհավորել է հոգեբանների վերապատրաստման կապակցությամբ և նշել, որ սա ՄԱԿ-ի Բնակչության հիմնադրամի հայաստանյան գրասենյակի և Անչափահասների արդարադատության խորհրդի համագործակցության սկիզբն է:
Հաջորդիվ, Արդարադատության նախարարության քրեական օրենսդրության, քրեակատարողական և պրոբացիայի ոլորտի քաղաքականության մշակման վարչության պետ Արփինե Սարգսյանը Խորհրդի անդամներին ներկայացրել է «Վերջ երեխաների նկատմամբ բռնության» (End Violence Against Children the Global Parntnership) միջազգային ցանցին Հայաստանի՝ որպես ուղենիշ երկրի ներկայացվելիք հայտարարության հիմնական կետերը:
Նիստի ընթացքում ելույթներ են ունեցել նաև Արդարադատության նախարարի տեղակալ Արմեն Հովհաննիսյանը, ՀՀ ԱՆ «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի տնօրեն Արտակ Ղուլյանը, ՀՀ-ում Մարդու իրավունքների պաշտպանի աշխատակազմի Երեխայի իրավունքների պաշտպանության բաժնի պետ Իվետա Շահբազյանը:
Հանդիպման ավարտին «Անչափահասի, անգործունակի կամ հոգեկան առողջության խնդիր ունեցող անձի, ընտանեկան բռնության գործերով քննչական գործողության կատարմանը ներգրավվող հոգեբանների վերապատրաստում» դասընթացի մասնակիցներին հանձնվել են հավաստագրեր: