Ես այսօր էլ եմ պատրաստ իմ որդուն հանձնել գերիների վերադարձի դիմաց, և դեռ նախընտրական քարոզարշավի ընթացքում նաև միջնորդել եմ, որ ձեր քաղաքական ուժերը այդ հարցում որոշակի գործնական աջակցություն ցուցաբերեն, և հիմա էլ եմ առաջարկում, որովհետև մենք այդ առաջարկը այն ժամանակ պաշտոնական, ոչ պաշտոնական խողովակով արել ենք ադրբեջանական կողմին, որը, ցավոք, արձագանք չի գտել. որ պահին արձագանք կգտնի, դա ուժի մեջ գտնվող արձագանք է: Այս մասին, ԱԺ-Կառավարություն հարցուպատասխանի ժամանակ, արձագանքելով «Հայաստան» խմբակցության պատգամավոր Էլինար Վարդանյանի՝ գերիների վերադարձի վերաբերյալ հարցին, ասաց ՀՀ վարչապետ Նիկոլ Փաշինյանը:
«Մենք հայտարարել ենք, հայտարարում ենք, որ ամեն օր աշխատանք է արվում գերիների վերադարձի համար, բայց դա չի նշանակում, որ վերադարձան՝ հետաքննություն չի արվելու. իհարկե, արվելու է. արվել է, արվում է և արվելու է»,- ասաց Փաշինյանը:
Նա ընդգծեց, որ կլինեն գերեվարման դեպքեր, որտեղ կոնկրետ քրեաիրավական հետևանք չի լինի, կլինեն գերեվարման դեպքեր, որտեղ քրեաիրավական հետևանքներ կլինեն:
«Վերևից հրաման են տվել, որ հայրենիքը չպաշտպանեն, որ չկրակեն, վերևից հրաման են տվել, որ գերի հանձնվեն, վերևից հրաման են տվել, որ գերեվարված ադրբեջանցիներին բաց թողնեն. եթե եղել է նման հրաման, նման հրաման տված մարդիկ կդատվեն, բայց էդ ամեն ինչը բացարձակ իրականության հետ կապ չունի. մենք պարզ բան ենք ասում, ասում ենք՝ զինվորականը ունի պարտականություններ և իրավունքներ, ինչպես մեզնից յուրաքանչյուրը. զենքը տրվում է զինվորականին ի պատասխանատվություն: Զենք կորցնելը քրեական պատասխանատվություն է ենթադրում»,- նշեց վարչապետը:
Ինչ վերաբերում է գերիների վերադարձի փոխարեն իր որդուն Ադրբեջանին հանձնելուն, ապա Նիկոլ Փաշինյանն ասաց, որ հետ չի կանգնել այդ գաղափարից:
Անդրադառնալով «Հայաստան» խմբակցության քարտուղար Արծվիկ Մինասյանի հարցին, թե ինչ քայլեր են արվել և արվում գերիների հետ կապված՝ Փաշինյանն ասաց. «Ամենաթարմ օրինակը. մեր Կառավարությունը հարցը բարձրացրել է միջազգային դատարանում, և կարծում եմ, որ դատարանը շատ կարևոր արձանագրում է արել: Իհարկե, զուտ ռազմագերիներին, պատանդներին, այլ պահվող անձանց անմիջապես ազատ արձակելու պահանջով հանդես չի եկել միայն մի պատճառով. որ այդտեղ ռասայական խտրականության արտահայտություն չի տեսել, բայց, մյուս կողմից, արձանագրել է, որ մարտական գործողությունների ընթացքում գերեվարված անձինք պետք է միջազգային կանոնների համաձայն հայրենադարձվեն: Ինչ վերաբերում է մնացած մասով՝ մենք ամենօրյա աշխատանք ենք անում մեր բոլոր դիվանագիտական ճանապարհներով, բոլոր բանակցություններում այդ հարցը քննարկվում է, և միջոցներ են ձեռնարկվում»:
Կոմունիկացիաների բացում ապահովելու ենք, մենք դրանում հետաքրքրված ենք: Այս մասին ԱԺ-Կառավարություն հարցուպատասխանի ընթացքում հայտնեց ՀՀ վարչապետ Նիկոլ Փաշինյանը: Խոսելով հարցի իրավական հատվածի մասին՝ Փաշինյանն ընդգծեց՝ «որ ճանապարհը պետք է լինի Հայաստանի սուվերենության ներքո և ՀՀ օրենսդրությամբ պիտի գործի՝ դա մեր ընդհանուր ընկալումն է, դա ՀՀ պաշտոնական տեսակետն է»:
ՀՀ վարչապետը խոսեց նաև երթուղիների մասին:
«Հարցը կբաժանեի 2 մասի՝ երկաթուղային երթուղի, որտեղ մենք մի տարբերակ ունենք՝ դա Երասխ-Օրդուբադ-Մեղրի-Հորադիզ երկաթուղին է, որը պետք է վերականգնվի: Իսկ ավտոմոբիլային ճանապարհների հետ կապված մենք մի քանի տարբերակ ենք քննարկում, հույս ունեմ, որ մենք կգանք արագ լուծումների և համաձայնեցումների»,- ասաց Փաշինյանը:
