ՀՀ պաշտպանության նախարարությունից հայտնում են, որ դեկտեմբերի 8-ի ուշ երեկոյան Ադրբեջանի զինված ուժերի ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի արևելյան հատվածում տեղակայված ՀՀ ԶՈՒ մարտական դիրքերի ուղղությամբ։
Պատասխան գործողություններով հակառակորդի կրակը լռեցվել է։ Հայկական կողմից տուժածներ չկան։
ՀՀ պաշտպանության նախարարությունը Ադրբեջանի պաշտպանական գերատեսչությանը կոչ է անում ձեռնպահ մնալ իրադրությունը սրելուն միտված սադրիչ գործողություններից։
Դեկտեմբերի 8-ին Հայաստանի հայ-ադրբեջանական պետական սահմանի Քարվաճառի ուղղությամբ կրակոցների հետևանքով սպանվել է ադրբեջանցի զինծառայող Ալիև Ասիֆ Ադիլօղլուն։ Այս մասին հայտնում է Ադրբեջանի պաշտպանության նախարարությունը։
Ավելի վաղ ՀՀ ՊՆ-ն հայտնել էր, որ դեկտեմբերի 8-ին Ադրբեջանի ԶՈՒ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի հարավ-արևմտյան ուղղությամբ տեղակայված ՀՀ ՊՆ N զորամասի թիկունքային ապահովման (ջրատար) մեքենայի ուղղությամբ։
Այնուհետ Ադրբեջանի ՊՆ-ն հայտարարել էր, թե հայակական կողմը կրակ է բացել իր դիրքերի ուղղությամբ, ինչը ՀՀ ՊՆ-ն հերքել էր: