ՀՀ ազգային ժողովի ընդդիմադիր «Հայաստան» խմբակցության պատգամավոր Թադևոս Ավետիսյանը կողմ է պատվաստումներին, սակայն դեմ՝ չպատվաստված կամ թեստի պատասխան չունեցող անձանց աշխատանքի չթողնելու, ընդհուպ աշխատանքից ազատելու առաջարկվող կարգավորմանը: Ավետիսյանն այս մասին ասաց ԱԺ նիստում կառավարության նախագծի քննարկմանը:
«Սա այն դեպքն է, որ դրված նպատակն իհարկե շատ լավ ն է՝ ձևակերպումներով, սակայն այն կարգավորումը, որն այսօր բերում է կառավարությունը, բացարձակապես նպատակի հետ աղերս չունի, ավելին՝ խնդիրն ավելի է սրելու: Կոչս նույնն է՝ բոլորն, ովքեր ենթակա են պատվաստման, գնան պատվաստվեն: Սա շատ կարևոր է, բայց պետությունն իր պոզիտիվ պարտականության՝ խթանելու, խրախուսելու, մարդկանց բացատրելու, գիտակցությունը փոխելու փոխարեն անցել է հարկադրանքին, հարկադրում է մարդու աշխատելու իրավունքն առողջ լինելու իրավունքի հետ: Չի լինելու լուծում, քանի որ իրականում սա ավելի շատ տուգանք է»,-ասաց պատգամավորը:
Ըստ նրա՝ ով որ չի եկել գիտակցության, որ պետք է պատվաստվի, չի պատվաստվելու՝ նաև աշխատանքը կորցնելու սպառնալիքի տակ, որովհետև աշխատանքն այդ մարդու համար ավելի կարևոր չէ, քան առողջությունը: «Մենք պետք է իրենց բացատրենք, որ առողջության ճանապարհը պատվաստվելն է, ոչ թե ասենք՝ տես՝ աշխատանքը կկորցնես: Սա լուծում չէ, և չի կարող լինել»,-ասաց Ավետիսյանը:
Ըստ նրա՝ կարելի է գոնե բավարարվել չպատվաստված կամ թեստի պատասխան չունեցող անձանց միայն աշխատանքի չթողնելով:
ԱԺ ներկայացված նախագծով գործատուին հնարավորություն է տրվում Covid-19-ի դեմ պատվաստման կամ ՊՇՌ թեստի սերտիֆիկատ չներկայացնող աշխատակցին չթույլատրել գտնվել աշխատավայրում, կատարել իր աշխատանքային պարտականությունները, չկատարելու հիմքով ընդհուպ լուծել աշխատանքային պայմանագիրը:
