Վրաստանում Եվրամիության պատվիրակությունը ողջունել է «Օտարերկրյա գործակալների մասին» օրինագծի հետկանչումը երկրի խորհրդարանից:
«Մենք ողջունում ենք իշխող կուսակցության հայտարարությունը «Օտարերկրյա ազդեցության» մասին օրինագիծը հետ կանչելու վերաբերյալ: Վրաստանի բոլոր քաղաքական առաջնորդներին կոչ ենք անում վերսկսել Եվրամիության հետ ինտեգրմանն ուղղված բարեփոխումները ներառական և կառուցողական ձևով և Վրաստանի 12 առաջնահերթություններին համապատասխան՝ հասնելու ԵՄ անդամակցության թեկնածուի կարգավիճակի»,- նշված է պատվիրակության Twitter-ի միկրոբլոգում:
Վրաստանում բողոքի ակցիաների ֆոնին «Օտարերկրյա գործակալների մասին» օրինագիծը հետ է կանչվել խորհրդարանից: Օրինագիծը նախաձեռնած իշխող «Վրացական երազանք» կուսակցությունը և «Ժողովրդի ուժ» հասարակական շարժումը համատեղ հայտարարություն են տարածել:
«Պետք է առավել ուշադիր լինենք մեր երկրում խաղաղության և տնտեսական զարգացման, ինչպես նաև Վրաստանի եվրաինտեգրման նկատմամբ: Անհրաժեշտ է մեր համաքաղաքացիների էներգիան ծախսել ոչ թե առճակատման, այլ երկրի զարգացման վրա»,- ասված է փաստաթղթում:
Վրացական լրատվամիջոցները գրում են, որ իշխանությունները, այնուամենայնիվ, մտադիր են հետագայում հանդիպումներ անցկացնել բնակչության հետ և բացատրել օրինագծի էությունն ու կարևորությունը:
Ընդդիմադիր վրացական «Գիրչի՝ ավելի շատ ազատություն» կուսակցությունը, ոչ կառավարական կազմակերպությունների ներկայացուցիչները և ուսանողները կշարունակեն բողոքի ցույցերը՝ չնայած օտարերկրյա գործակալների մասին օրինագծի հետկանչմանը, հայտարարել է կուսակցության խոսնակ Ցոտնե Կոբերիձեն։
«Այսօր անպայման ակցիա է լինելու, երիտասարդները չեն վստահում «Վրացական երազանքին», մենք պահանջում ենք երկու կետ՝ հստակություն է պետք, թե ինչպես են նախատեսում հետ կանչել նախագիծը, և երկրորդ՝ պետք է ազատ արձակել այն մարդկանց, որոնք կռվել են մեզ հետ»,- ճեպազրույցում ասել է քաղաքական գործիչը։