Այսօր Իրանում անցկացվում է նախագահական ընտրությունների երկրորդ փուլը:
Նախագահի պաշտոնի համար պայքարում են թեկնածուներ Մասուդ Փեզեշքիանը և Սաեդ Ջալիլին:
Հիշեցնենք, Իրանի նախագահի պաշտոնը թափուր էր մնացել նախագահ Ռայիսիի զոհվելուց հետո. մայիսի 19-ին Իրանի նախագահ Ռաիսիին տեղափոխող ուղղաթիռը կոշտ վայրէջք է կատարել Ադրբեջանի հետ սահմանի` Ջուլֆա քաղաքի մոտ։ Զոհվել էր նաև ԱԳ նախարար Աբդոլլահիանը։
Միացյալ Թագավորությունում Լեյբորիստական կուսակցությունը՝ սըր Քիր Սթարմերի գլխավորությամբ, արտահերթ խորհրդարանական ընտրությունների արդյունքում համայնքների պալատում ստացել է ձայների մեծամասնությունը:
Ավարտվել է Միացյալ Թագավորությունում պահպանողականների 14-ամյա կառավարման շրջանը։ Ձայների հաշվարկը դեռ չի ավարտվել բոլոր ընտրատարածքներում, սակայն լեյբորիստներն արդեն պաշտոնապես հաղթել են 381-ում, ինչը նրանց մեծամասնություն է ապահովում 650 տեղանոց պալատում. Radar Armenia-ն տեղեկացավ BBC-ից։
Քիր Սթարմերը և ստվերային կառավարությունում ֆինանսների նախարար Ռեյչել Ռիվզը, որին սպասվում է ապագա կառավարությունում երկրորդ կարևորագույն պաշտոնը, վստահորեն հաղթել են իրենց ընտրատարածքներում:
Գործող վարչապետ Ռիշի Սունակին նույնպես հաջողվել է վերընտրվել իր Ռիչմոնդ և Նորթալերտոն կոմսությունում: Միևնույն ժամանակ, նա խոստովանել է, որ պահպանողականները պարտվել են և հայտնել, որ շնորհավորել է Սթարմերին հաղթանակի կապակցությամբ: «Այսօր իշխանությունը ձեռքից ձեռք հանձնելը տեղի կունենա խաղաղ և կարգավորված ձևով, բոլոր կողմերից բարի կամքով։ Սա պետք է բոլորիս վստահություն տա մեր երկրի կայունության և ապագայի նկատմամբ ։ Մեծ Բրիտանիայի ժողովուրդն այսօր սթափեցնող դատավճիռ է կայացրել, շատ բան պետք է սովորել ... և ես ինձ վրա եմ վերցնում պարտության պատասխանատվությունը»,- ասել է Սունակը:
