«Ադրբեջանն ամեն ինչ անում է Բաքու-Ստեփանակերտ երկխոսությունը վիժեցնելու համար». հայտարարել է ՀՀ վարչապետ Նիկոլ Փաշինյանը։

Նրա խոսքով՝ ի հեճուկս միջազգային մակարդակով ձեռք բերված պայմանավորվածությունների՝ երկու հանդիպումից հետո Ադրբեջանը հայտարարել է, թե ԼՂ հայերի հետ քննարկելու է վերաինտեգրման թեման. «Մինչդեռ միջազգային պայմանավորվածությունն այն մասին է, որ քննարկումը պետք է լինի ԼՂ ժողովրդի իրավունքների և անվտանգության մասին։ Այս ֆոնին կարևոր է դառնում Ստեփանակերտ-Բաքու երկխոսության միջազգային մեխանիզմի գործարկումը, որովհետև հիմա արդեն ակնհայտ է, որ առանց նման մեխանիզմի՝ օրակարգը կձախողվի, մոռացության կմատնվի Բաքվի կողմից։ Մեզ համար նաև մտահոգիչ է փաստը, որ մինչև հիմա չի գործարկվել 2020թ. նոյեմբերի 9-ի եռակողմ հայտարարության 7-րդ կետով սահմանված միջազգային մեխանիզմը»,- ասաց նա՝ մեջբերելով հայտարարության դրույթը։

Նրա մեկնաբանմամբ՝ Լաչինի և ԼՂ հարակից շրջանների հայերի վերադարձի միջազգային մեխանիզմներ պետք է գործարկվեն. «Ես ԱԳՆ-ին հանձնարարել եմ այս թեմայով բանակցություններ սկսել ՄԱԿ փախստականների հարցերով գլխավոր հանձնակատարի հետ»։