Միացյալ Նահանգները հավատարիմ է խաղաղ, ժողովրդավարական և բարգավաճ Հարավային Կովկասի զարգացմանը: Այս մասին ադրբեջանական Turan գործակալության թղթակցին ասել է Պետքարտուղարության քաղաքական-ռազմական հարցերի բյուրոյի քարտուղար Ջեսիկա Լյուիսը՝ հինգշաբթի օրը ելույթ ունենալով Վաշինգտոնում անվտանգության հարցերի շուրջ ճեպազրույցում։
Պատասխանելով Արցախում խաղաղության վերականգնման գործում Վաշինգտոնի դերի մասին, նա վերահաստատել է ամերկյան կողմի դիրքորոշումն առ այն, որ «հակամարտությունը ռազմական լուծում չի կարող ունենալ, և որ վեճերը լուծելու համար ուժի կիրառումն անընդունելի է»։
Նա կրկնել է պետքարտուղար Էնթոնի Բլինկենի խոսքերն այն մասին, որ «Հայաստանի և Ադրբեջանի միջև ուղիղ երկխոսությունը հիմնախնդիրների լուծման և կայուն խաղաղության հասնելու բանալին է»:
Տարածաշրջանում խաղաղապահ գործողություններին մասնակցելու Վաշինգտոնի շահագրգռվածության մասին հարցին պատասխանելիս Լյուիսը հիշեցրել է, որ իր բյուրոն զբաղվում է նման առաքելությունների համար խաղաղապահների նախապատրաստմամբ։
«Կարծում եմ, որ մենք պետք է ուշադիր քննարկենք դրա հնարավորությունը: Ակնհայտ է, որ այդ գործընթացն ընթանում է ՄԱԿ-ով, և ես ձեռնպահ կմնամ մեկնաբանություններից առ այն, թե ինչպես է ՄԱԿ-ը կառավարելու այդ գործընթացները ապագայում։ Բայց ես իսկապես կարծում եմ, որ մենք պետք է քննարկենք այս գործընթացին ոչ միայն Ռուսաստանի կողմից աջակցությունը։ Ռուսական տեխնիկան այժմ դժվարություններ ունի (պայմանավորված արևմտյան պատժամիջոցներով՝ Tert.am), օրինակ՝ պահեստամասեր ձեռք բերելու հարցում, և դա կարող է ազդել խաղաղապահների՝ իրենց խաղաղապահ աշխատանքն իրականացնելու ունակության վրա»,- ընդգծել է նա։
