Մենք իսկապես անհանգստացած ենք թշնամական հռետորաբանության և Լեռնային Ղարաբաղում միջադեպերի քանակի աճով, ինչպես նաև Լաչինի միջանցքի շուրջ իրավիճակի կարգավորման հարցում փոխզիջումների գնալու՝ կողմերի պատրաստակամության բացակայությամբ: Նման հայտարարությամբ է հանդես եկել Ռուսաստանի արտգործնախարարության պաշտոնական ներկայացուցիչ Մարիա Զախարովան:
«Խաղաղ գործընթացն այլընտրանք չունի: Կողմերին իրենց հայտարարություններում և գործողություններում զսպվածության կոչ ենք անում, հորդորում ենք վերսկսել բանակցությունները հայ-ադրբեջանական կարգավորման բոլոր ուղղություններով, այդ թվում՝ տրանսպորտային հաղորդակցությունների ապաշրջափակում, սահմանի սահմանազատում, խաղաղության պայմանագրի պատրաստում, պատգամավորների, հասարակական գործիչների հանդիպումների անցկացում»,- ասել է Զախարովան:
Նրա խոսքով՝ տարածաշրջանում Արևմուտքի, Եվրամիության ներգրավումից հետո առաջացան լայնածավալ խնդիրներ: «Խաղաղության, օգնելու պատրաստակամության մասին բոլոր հայտարարությունների ետևում տեսնում ենք լիովին հակառակ պատկեր»,- հավելել է դիվանագետը:
Զախարովան չի մեկնաբանել ԱՄՆ պետքարտուղար Էնթոնի Բլինքենի հայտարարությունն այն մասին, որ հնարավոր է՝ Հայաստանն ու Ադրբեջանը շուտով խաղաղության համաձայնագիր ստորագրեն:
ՌԴ ԱԳՆ խոսնակ Մարիա Զախարովան, իր ամենշաբաթյա ասուլիսում անդրադառնալով հայ-ադրբեջանական բանակցային գործընթացին և ՀՀ ԱԺ նախագահ Ալեն Սիմոնյանի հայտարարությանը, թե ՀԱՊԿ-ը դուրս է գալիս Հայաստանից, ասել է. «Որքան քաղաքական գործիչներ, այնքան՝ տարատեսակ մեկնաբանություններ և կարծիքներ, նաև, ի դեպ, հնարավորություն, որ իրենց վրա ուշադրություն դարձվի ինչ-որ վառ հայտարարություններով։
Ես առաջին անգամը չէ, որ լսում եմ, թե ՀԱՊԿ-ը դուրս է գալիս Հայաստանից, և ուզում եմ կրկին հարցեր ուղղել ՀՀ կողմին, թե նրանք, ովքեր ասում են՝ ՀԱՊԿ-ը դուրս է գալիս Հայաստանից, ինչպե՞ս են տեսնում ՀԱՊԿ մուտքը, երևի ինչ-որ կերպ տեսնում են»։