Եվրասիական տնտեսական հանձնաժողովի և ՇՀԿ քարտուղարության միջև կարող է փոխըմբռնման հուշագիր ստորագրվել Հայաստանում այս տարվա աշնանը կայանալիք Եվրասիական տնտեսական համաժողովի շրջանակում։
Այս մասին հուլիսի 3-ին Աստանայում Շանհայի համագործակցության կազմակերպության (ՇՀԿ) գլխավոր քարտուղար Չժան Մինի հետ բանակցությունների ժամանակ հայտարարել է ԵՏՀ Կոլեգիայի նախագահ Բակիջան Սագինտաևը։
ԵՏՀ մամուլի ծառայությունից հայտնում են, որ կողմերը քննարկել են ԵՏՀ-ի և ՇՀԿ-ի քարտուղարության միջև փոխըմբռնման հուշագրի շրջանակներում Եվրասիական տնտեսական միության և ՇՀԿ-ի երկրների համագործակցության հեռանկարները:
Սագինտաևը նշել է, որ ներկայումս ավարտվում է հուշագրի իրականացման գործողությունների ծրագրի նախապատրաստումը։
Խոսելով ԵԱՏՄ-ՇՀԿ ձևաչափով հետագա փոխգործակցության հնարավորությունների մասին՝ ԵՏՀ Կոլեգիայի ղեկավարն ընդգծել է Եվրասիական տնտեսական միության երկրների շահագրգռվածությունը միջազգային տրանսպորտային միջանցքների, մուլտիմոդալ և կոնտեյներային փոխադրումների, ինչպես նաև բեռնափոխադրումների թվայնացման հարցում։
Այդ կապակցությամբ Սագինտաևն առաջարկել է մոտ ժամանակներս անցկացնել ՇՀԿ անդամ երկրների տրանսպորտի նախարարների և ԵԱՏՄ երկրների տրանսպորտի ոլորտում լիազոր մարմինների ղեկավարների խորհրդի համատեղ նիստ։
Կողմերը քննարկել են նաև ՇՀԿ կենտրոնակայանում «ԵԱՏՄ օրեր» անցկացնելու ԵՏՀ նախաձեռնությունը։
Մինն իր հերթին նշել է, որ ՇՀԿ-ի և ԵԱՏՄ-ի միջև փոխգործակցության գործոնը գնալով ավելի էական է դառնում ժամանակակից համաշխարհային ճարտարապետության մեջ։
Եվրասիական տնտեսական միությունը միջազգային ինտեգրացիոն տնտեսական ասոցիացիա է, որը գործում է 2015 թվականի հունվարի 1-ից։ Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը։
