Առավոտյան ձերբակալվել է Երևանի քաղաքապետարանի աշխատակազմի նախկին ղեկավար Սեյրան Մեջլումյանը, որն օրեր առաջ է ազատվել աշխատանքից, և ճարտարապետության և քաղաքաշինության վարչության պետի պաշտոնակատար Դավիթ Դալլաքյանը: Տեղեկությունը «Լուրերին» հաստատել են Հակակոռուպցիոն կոմիտեից, այլ մանրամասներ չեն հայտնել:
«Երևանի քաղաքապետարանում Հակակոռուպցիոն կոմիտեի վերջին գործողությունները ևս մեկ անգամ գալիս են հիշեցնելու, որ պետական, համայնքային և, առհասարակ, հարկատուների հաշվին պաշտոն զբաղեցնելն ինչքան պատվաբեր է, կրկնակի էլ պատասխանատվության բաժին է ենթադրում»:
Այս մասին «Ֆեյսբուք»-ի իր էջում գրել է Երևանի փոխքաղաքապետ Տիգրան Ավինյանը՝ նշելով, որ չցանկանալով խախտել անմեղության կանխավարկածը՝ քննությունից ակնկալում է լրիվ և բազմակողմանի բացահայտում, քանի որ դա է պահանջում Երևանի և երևանցու շահը:
«Միևնույն ժամանակ սթափության կոչ եմ անում քաղաքապետարանի և համայնքային կազմակերպությունների անխտիր բոլոր աշխատակիցներին՝ հորդորելով իրենց ջանքերը ծառայեցնել բացառապես մայրաքաղաքին»,- գրել է Ավինյանը: