Երևանի Բրյուսովի անվան պետական համալսարանի ուսանողներն այս պահին բողոքի ցույց են կազմակերպել բուհում։ Հայտարարված է դասադուլ և գործադուլ։ 

Բանն այն է, որ ուսանողները և դասախոսները բոյկոտում են ԿԳՄՍ նախարության որոշումը։ Լեզվաբան, հայերենագետ, ԿԳՄՍՆ լեզվի կոմիտեի նախագահ Դավիթ Գյուրջինյանը նշանակվել է Բրյուսովի անվան համալսարանի ռեկտորի պաշտոնակատար: Այդ մասին «Ֆեյսբուք»-ի իր էջում հայտնել է բուհի ռեկտորի նախկին պաշտոնակատար Ցոլակ Ակոպյանը:

Ուսանողների խոսքով՝ Բրյուսովի անվան պետական համալսարանը հնարավորություն ունի դառնալ ազգային և ակադեմիական արժանապատվություն ցույց տվող կրթօջախ, այդ պատճառով նրանք դեմ են Գյուրջինյանի նշանակմանը։

Հիշեցնենք՝ ԿԳՄՍ նախարարության ոոշմամբ՝ վերջին շրջանում  Բրյուսովի անվան պետական համալսարանի ռեկտորի պարտականությունները կատարում էր պրոռեկտոր Ցոլակ Ակոպյանը: Երեկ էլ հայտնի էր դարձել, որ արդարադատության նախարար Գրիգոր Մինասյանի հրամանով հաստատվել է «Վալերի Բրյուսովի անվան պետական համալսարան» հիմնադրամի ժամանակավոր խորհրդի՝ 3 անձից բաղկացած կազմը:

Նշենք, որ Գյուրջինյանը բուհում կլինի 16։30, քանի որ այդ ժամին է նախատեսված, որ ԿԳՄՍ նախարարը բուհի ողջ կազմին պետք է ներկայացնի ռեկտորի նոր պաշտոնակատարին։