Freedom House-ի հրապարակած «Ազատությունն աշխարհում 2023» զեկույցում Հայաստանը և Արցախի Հանրապետությունը գնահատվել են որպես «մասամբ ազատ»:
Հայաստանի հարևան Վրաստանը նույնպես դասվում է «մասամբ ազատ» երկրների շարքին, մինչդեռ Ադրբեջանը, Թուրքիան և Իրանը դասակարգվել են որպես «անազատ»:
Զեկույցում նշվում է, որ ադրբեջանական ուժերը շարունակել են գրոհել և գրավել հայկական տարածքը սահմանի երկայնքով՝ սպառնալով Երևանի ժողովրդավարական կառավարությանը և մեծացնելով լայնամասշտաբ պատերազմի վտանգը։
Զեկույցում նաև նշված է, որ Հայաստանը ՀԱՊԿ անդամ միակ երկիրն է, որը գնահատվել է որպես «մասամբ ազատ»։
2023 թվականի «Ազատությունն աշխարհում» զեկույցը 50-րդն է։ Այն հնարավորություն է տալիս անդրադառնալու վերջին հինգ տասնամյակների ընթացքում ժողովրդավարության մարտահրավերներին և ձեռքբերումներին: Առավել նշանակալից մարտահրավերներից է քաղաքացիական ազատությունների դեմ լայնածավալ հարձակումը, որը կարող է օգտագործվել կառավարություններին պատասխանատվության ենթարկելու համար, հատկապես՝ խոսքի ազատության:
Զեկույցում նշվում է, որ գլոբալ ազատությունը նվազում է արդեն 17-րդ տարին անընդմեջ։