Կառավարության նիստում վարչապետ Նիկոլ Փաշինյանն ասաց, որ պայմանավորվածությունները խախտելու Ադրբեջանի գործելակերպն է պատճառը, որ մենք շարունակում ենք պնդել, որ թե՛ խաղաղության պայմանագրի, և թե՛ ԼՂ ժողովրդի անվտանգության իրավունքների հարցում Ստեփանակերտ-Բաքու ձեռք բերված պայմանավորվածությունների իրագործման համար հուսալի միջազգային մեխանիզմներ են հարկավոր:
«Միջազգայնորեն ձեռք բերված պայմանավորվածությունների անպատիժ խախտումները Ադրբեջանին քաջալերում են գնալ նորանոր սադրանքների:
Նման մի հրեշավոր սադրանք տեղի է ունեցել երեկ, երբ Ադրբեջանական կողմը նպատակային՝ դիպուկահար կրակոցով սպանել է ՀՀ ԶՈՒ զինծառայող Արշակ Սերյոժայի Սարգսյանին: Ցավակցություն հայտնելով սպանված ժամկետային զինծառայողի ծնողներին, հարազատներին միջազգային հանրության ուշադրւթյունն եմ հրավիրում այն ակնհայտ փաստի վրա, որ Ադրբեջանն իրադրությունը զարգացնում է դեպի նոր էսկալացիա:
Այս խոսույթը ևս մեկ անգամ ի ցույց է դնում, որ հենց սկզբից ճիշտ ենք ընթերցել Ադրբեջանի ուղերձները, և այս շարունակական՝ գոյության իրավունքը կասկածի տակ դնող քաղաքականությունն ու խոսույթն է ԼՂ հակամարտության չկարգավորման պատճառը»,- նշեց Փաշինյանը:
Վարչապետի խոսքով՝ Ադրբեջանը հիմա էլ նոր մեղադրանք է մոգոնել, թե Հայաստանը մոնոէթնիկ երկիր է և Հայաստանում ազգային փոքրամասնություններ չկան:
«Նախ սա ՀՀ-ի ներքին գործերին կոպիտ միջամտություն է: Բացի այդ ՀՀ-ում ոչ միայն կան ազգային փոքրմասնություններ, նաև նրանք ներկայացված են ԱԺ-ում: Եթե սա միջամտություն չէ երկրի ներքին գործերին, ուրեմն արձանագրենք, որ Ադրբեջանում ոչ միայն մամուլի, ոչ միայն ընդդիմության, այլև ազգային փոքրամասնության ներկայացուցիչների նկատմամբ հետապնդումները կրում են համակարգային բնույթ»,- ասաց Փաշինյանը: