Ռուսաստանի Անվտանգության դաշնային ծառայությունը հաստատել է Բրյանսկի շրջանում ուկրաինական դիվերսիոն խմբի դեմ ընթացող մարտերի վերաբերյալ լրատվամիջոցներում տարածված տեղեկությունը:
«Բրյանսկի մարզի սահմանամերձ Կլիմովսկի շրջանում Ռուսաստանի ԱԴԾ-ն և ՌԴ պաշտպանության նախարարության օժանդակ ուժերը միջոցառումներ են անցկացնում պետական սահմանը խախտած ուկրաինացի ազգայնականների ոչնչացման ուղղությամբ»,- հայտնել են ՌԴ ԱԴԾ-ից:
Կրեմլի խոսնակ Դմիտրի Պեսկովը նշել է. «Խոսքը ահաբեկիչների հարձակման մասին է, միջոցներ են ձեռնարկվում նրանց ոչնչացնելու համար»: Նա նաև հերքել է Բրյանսկի մարզում տեղի ունեցած իրադարձությունների կապակցությամբ ՌԴ Անվտանգության խորհրդի արտահերթ նիստ անցկացնելու մասին ԶԼՄ-ների տեղեկությունը:
Ռուսական լրատվամիջոցները հայտնում են, որ Բրյանսկի մարզ ներթափանցած ուկրաինացի դիվերսանտները պատանդ են վերցրել, ապա ազատել Լյուբեչանե գյուղի բուժակին։ Այդ մասին ТАСС-ին հայտնել է տեղի բնակիչներից մեկը, ով ականատես է եղել միջադեպին։
«Ուկրաինացի դիվերսանտների հարձակման ժամանակ պատանդ է վերցվել Լյուբեչանե գյուղի բուժակը, նա այժմ ազատ է արձակվել։ Բուժաշխատողը անձնական մեքենայով դուրս էր եկել Նովի Ռոպսկ գյուղից, նա մեքենայում մենակ էր», - ասել է գործակալության զրուցակիցը։
Ականատեսի խոսքով՝ տեղի բնակիչներն իրենց տներում են, պատուհանները փակ են, ոչ ոք չի կարող հեռանալ, կրակոցների ձայներ են լսվում։
ТАСС-ը նաև հաղորդում է, որ ՌԴ նախագահ Վլադիմիր Պուտինը չեղարկել է իր այցը Պյատիգորսկ՝ կապված Բրյանսկում տիրող իրավիճակի հետ: Ըստ ՌԴ նախագահի մամուլի քարտուղար Դմիտրի Պեսկովի՝ Պուտինն ուսուցիչների հետ պլանավորված իր հանդիպումը կանցկացնի տեսակապի միջոցով:
Պեսկովը նաև հայտնել է, որ ՌԴ նախագահը ԱԴԾ-ից, ՊՆ-ից և Ռոսգվարդիայից ստանում է զեկույցներ Բրյանսկի մարզում տիրող իրավիճակի և ձեռնարկվող գործողությունների վերաբերյալ: Պուտինը նաև կապի մեջ է Բրյանսկի նահանգապետ Ալեքսանդր Բոգոմազի հետ:
ТАСС-ը նաև հաղորդում է, որ ուկրաինացի դիվերսանտների գործողությունների ժամանակ վիրավորում ստացած տասը տարեկան տղան գտնվում է հիվանդանոցում, նրա կյանքին վտանգ չի սպառնում:
Ավելի վաղ ՌԻԱ Նովոստին հայտնել էր, որ Լյուբեչան գյուղի խանութներից մեկում մի քանի մարդ պատանդ է վերցվել։ Բրյանսկի մարզի ղեկավար Ալեքսանդր Բոգոմազն էլ հայտնել էր երկու գյուղի վրա հարձակման մասին: Նրա խոսքով՝ ուկրաինացի դիվերսանտները կրակել են մեքենաներից մեկի ուղղությամբ, ինչի հետևանքով մեկ մարդ մահացել է, ևս մեկը՝ վիրավորվել:
