Երեկ երեկոյան գլխավոր դատախազության դիմացից ոստիկանություն բերման ենթարկված բողոքի ակցիայի 14 մասնակիցները ազատ են արձակվել։ Միջադեպի հետ կապված հարուցվել է քրեական գործ՝ 258-րդ հոդվածի հատկանիշներով (խուլիգանություն), և գործն ուղարկվել է Քննչական կոմիտե։ Այս մասին ՀԺ-ին փոխանցեցին ՀՀ ոստիկանությունից: Հարցին, թե ինչպե՞ս է իրեն զգում այն ոստիկանը, ում ինքնազգացողությունը հրմշտոցի հետևանքով վատացել էր, ոստիկանությունից հայտնեցին, որ ոստիկանն արդեն լավ է:
Հիշեցնենք, որ երեկ Մեղրիի քաղաքապետ Մխիթար Զաքարյանի ձերբակալության լուրն իմանալուց հետո Սյունիքի նախկին մարզպետ Վահե Հակոբյանը հայտարարեց, որ 18:30 ակցիա են իրականացնելու: Ակցիայի մասնակիցները քայլերթով եկան դատախազության շենք՝ հանդիպում պահանջելով գլխավոր դատախազի հետ: Դատախազության առաջարկը՝ հանդիպելու դատախազի տեղակալի հետ մերժելուց հետո ակցիայի մասնակիցները փորձեցին մուտք գործել դատախազության շենք՝ ձվեր և այլ իրեր շպրտելով ոստիկանների ուղղությամբ, ինչից հետո տեղի ունեցան բախումներ, բերման ենթարկվեց 14 անձ: