Արագածոտնի մարզի Ապարան համայնքում նախատեսվում է մեծ ներդրումային ծրագիր իրականացնել, իսկ ավելի կոնկրետ՝ լեռնային համալիր կառուցել:

ՀՀ էկոնոմիկայի նախարարությունը քննարկման է դրել «Մայլեռ Մաունթայն Ռեզորթ» ՓԲ ընկերության Ապարան համայնքի տարածքում 2070 հեկտար ընդհանուր մակերեսով հողամասում ներդրումային ծրագիր իրականացնելու վերաբերյալ նախագիծը:

Ըստ նախարարության՝ ծրագիրը միտված է ՀՀ-ում զբոսաշրջության բազմազանության ու զարգացման ապահովմանը, ինչպես նաեւ բնակչության մեջ առողջ ապրելակերպի հաստատմանը եւ համահունչ է ՀՀ կառավարության կողմից որդեգրած տնտեսական զարգացման ռազմավարությանը:

Որպես հիմնավորում նշված է, որ ՀՀ-ն՝ որպես լեռնային զբոսաշրջության ուղղություն, տարածաշրջանում գտնվում է ամենաթույլ դիրքերում. որպես առաջատար հանդես է գալիս Վրաստանը, իսկ հետո՝ Ադրբեջանը։

ՀՀ-ում ներկայումս կա գործող երկու հանգստյան գոտի (Ջերմուկ եւ Ծաղկաձոր համայնքներում), որոնք առաջարկում են լեռնային, մասնավորապես՝ լեռնադահուկային ժամանց:

Այդ գոտիներում զբոսաշրջիկների մեծ մասը ՌԴ քաղաքացիներ են, երկրորդ տեղում են Իրանից ժամանող այցելուները: Այս առումով Հայաստանը գտնվում է շահեկան դիրքում, քանի որ ռուս զբոսաշրջիկները կարող են ժամանել ՀՀ ներքին անձնագրերով:

Ծաղկաձորում ճոպանուղու օրական տոմսն արժե 12.000 դրամ (շուրջ 25 ԱՄՆ դոլար), իսկ Վրաստանում 40 լարի (շուրջ 15 ԱՄՆ դոլար): Հետեւաբար այլընտրանքային լեռնային համալիրի ստեղծումը հնարավորություն է ստեղծում ձեւավորել մրցակցային գնային միջավայր։

Այս նախագծի ընդունման դեպքում հնարավորություն կստեղծվի ՀՀ Արագածոտնի մարզում հիմնել բազմաֆունկցիոնալ լեռնային համալիր։

Նախարարությունը նշել է, որ ծրագրի իրականացումը բացառիկ է նրանով, որ նմանօրինակ ենթակառուցվածքային ներդրումներ մասնավոր հատվածի կողմից Հայաստանում երբեւէ չեն իրականացվել, եւ նման համագործակցության հաջողված օրինակը կարող է հզոր խթան հանդիսանալ պետություն-մասնավոր համագործակցության հետագա զարգացման համար:

Լեռնային համալիրի կառուցման ընթացքում ներգրավված կլինեն շինարարության ոլորտի շուրջ 250 աշխատողներ, իսկ ծրագիրը իրականացնելուց հետո կստեղծվի շուրջ 1500 հիմնական աշխատատեղ, միջինը՝ 180 հազար դրամ աշխատավարձով։ 

Ծրագիրն իրականացնող կազմակերպությունը պատրաստվում է շուրջ 15 միլիարդ դրամ ներդնել միայն ճոպանուղու եւ սահուղիների կառուցման համար, ինչը կդառնա իր շուրջ զբոսաշրջային նոր քաղաքի ստեղծման առաջին եւ ամենակարեւոր գրավականը։

Միաժամանակ ընկերությունը նոր ներդրողներ ներգրավելու միջոցով նախատեսում է ապահովել եւս 15 միլիարդ դրամի ներդրումներ հյուրանոցային հատվածում։