Հայ հեղափոխական դաշնակցության անդամներ Գեղամ Մանուկյանը, Գերասիմ Վարդանյանը և Արծվիկ Մինասյանը հրավիրվել են Երևան քաղաքի քննչական վարչություն:
«Արմենպրես»-ի հետ զրույցում այս մասին ասաց ՀՀ քննչական կոմիտեի մամուլի խոսնակ Վարդան Թադևոսյանը:
«Գեղամ Մանուկյանը, Գերասիմ Վարդանյանը և Արծվիկ Մինասյանը որպես վկաներ կանչվել են Երևանի քննչական վարչություն»,- նշեց Թադևոսյանը:
Ապրիլի 29-ին Գեղամ Մանուկյանը «Ֆեյսբուքի» իր էջում գրել էր, որ իրենց քննչական վարչություն են կանչել 15:30-ին: Գրառմանը կից նա նաև հրապարակել է իրեն ուղարկված ծանուցագիրը:
Ծանուցագրում նշված է, որ ՀՀ քրեական դատավարության օրենսգրքի 174.1, 174.3-րդ, 174.4-րդ, 174.5-րդ և 174.6-րդ հոդվածներով սահմանված կարգի՝ 2021 թվականի ապրիլի 22-ին, ժամը 20-ի սահմաններում ՀՀ գլխավոր դատախազության շենքի դիմաց մի խումբ անձանց կողմից խուլիգանություն կատարելու, որը զուգորդվել է իշխանության ներկայացուցչին կամ խափանող անձին դիմադրություն ցույց տալու փաստի առթիվ ՀՀ քրեական օրենսգրքի 258-րդ հոդվածի (խուլիգանություն) 3-րդ մասի 1-ին և 2-րդ կետերի հատկանիշներով քննվող քրեական գործով Մանուկյանը կանչվել է անմիջականորեն առաջացած կասկածանքի շուրջ որպես վկա հարցաքննության:
Փաստաբան Բենիկ Գալստյանն այսօր իր ֆեյսբուքյան էջում մի գրառում է կատարել, որի իմաստն այն է, որ ՀՅԴ մի քանի ներկայացուցիչներին այսօր Երևան քաղաքի քննչական վարչության կողմից հարցաքննության կանչելը հետևանք է այսօր ՀՀ գլխավոր դատախազության առջև ակցիա իրականացնելու ՀՅԴ Գերագույն մարմնի՝ երեկ արած հայտարարության: Այս մասին ֆեյսբուքյան իր էջում գրել է ՀՀ գլխավոր դատախազի խորհրդական Գոռ Աբրահամյանը:
«Հարկ եմ համարում պարզաբանել, որ դրանք բացարձակապես իրար հետ կապ չունեցող բաներ են: Հարցաքննության հրավիրվելու վերաբերյալ ծանուցագրերը կոնկրետ քրեական գործով առձեռն նշված անձանց սկսել են փոխանցվել՝ սկսած դեռևս ապրիլի 27-ից: Մասնավորապես՝ Արծվիկ Մինասյանին ստացականով, ծանուցագիրը առձեռն փոխանցվել է ապրիլի 27-ին, Գերասիմ Վարդանյանին՝ ապրիլի 28-ին, իսկ Գեղամ Մանուկյանին՝ ծանուցագրերը հնարավոր է եղել փոխանցել միայն այսօր առավոտյան՝ ավելի վաղ տեխնիկական պատճառներով դա իրականացնելը չհաջողվելու պատճառով: Ինչ վերաբերում է Իշխան Սաղաթելյանին և Տարոն Տոնոյանին, ապա նրանք որևէ գործով ՀՀ ՔԿ Երևան քաղաքի քննչական վարչություն չեն հրավիրվել:
Այսինքն նշվածներից առանձին անձինք քննչական գործողությանը իրենց մասնակցության մասին տեղեկացված են եղել դեռևս ապրիլի 27-ից, ինչը նշանակում է, որ չի կարող ծանուցագրերի փոխանցումը, հարցաքննությունների հրավիրվելը որևէ կերպ պայմանավորված լինել Դատախազության առջև նախատեսված ակցիայի հետ:
Իսկ եթե կարող է լինել պատճառահետևանքային կապ, ապա՝ ավելի շուտ հակառակ տրամաբանությամբ:
Հետևաբար մեր գործընկերոջը հորդորում ենք փաստերի աղավաղմամբ հանրությանը մոլորության մեջ չգցել և թյուր կարծիք չձևավորել»,- գրել է Աբրահամյանը: