Երևանյան լճի հարակից տարածքում նոր շենք է կառուցվում: Ըստ կիսակառույցի մոտ տեղադրված շինարարության մասին վկայող ցուցանակի, որի առկայությունը պարտադիր է օրենքով, այն կառուցվում է որպես հյուրանոցային համալիր: Չնայած դրան հարակից տարածքի աշխատակիցները ՀԺ-ի հետ զրույցում նշեցին, որ այն կառուցվում է, որպես բիզնես կենտրոն և մեքենաների ցուցադրման սրահ: Նրանց խոսքով՝ նորակառույցի սեփականատերը հարեւանությամբ գտնվող «CPS» բենզալցակայանի սեփականատերն է: Շենքը կառուցվում է գրեթե երկու տարի: Քաղաքապետարանից "Հայկական Ժամանակի" հետ զրույցում նույնպես հաստատեցին, որ շենքը կառուցվում է որպես հյուրանոցային համալիր: Տարածքի սեփականատերը շենքը կառուցելու համապատասխան թույլտվությունը քաղաքապետարանից ստացել է դեռ 2019 թվականին:
«Շինթույլտվությունը տրվել է որպես հյուրանոցային համալիր 2019 թվականի հունիսի վեցին, բայց սեփականատերը, ընթացակարգով, եթե ցանկանա, օրինակ՝ առաջին հարկում կամ նկուղային հարկում կարող է հասարակական նշանակության ինչ-որ բան կառուցել, այդտեղ արդեն քաղաքապետարանը միջամտելու լծակներ չունի: Այսինքն՝ շինությունը կառուցելու թույլտվությունը օրինական հիմքերով տրվել է քաղաքացուն»,- ասաց Երեւանի քաղաքապետարանի տեղեկատվության և հասարակայնության հետ կապերի վարչության պետի տեղակալ Տարոն Գևորգյանը:
Իսկ հնարավո՞ր է ապագայում լճի հարևանությամբ նոր կառուցվող այլ շինություններ ևս տեսնենք: ՀԺ հարցին ի պատասխան Գևորգյանն ասաց՝ քաղաքաշինության գործող օրենսդրությամբ լճի տարածքում որևէ բան կառուցելը արգելված չէ: Ըստ նրա՝ նաև այս շինությունը այդքան էլ ափին մոտ չէ, որքան Խորհրդային Միության ժամանակներում լճի հարևանությամբ կառուցված ռեստորանային համալիրները:
«Նոր շինությունները կլինեն թե չէ, հետագայում պարզ կլինի, հիմա չենք կարող ասել: Բայց որևէ բան չկա, որ արգելի լճի մոտ կամ հարակից տարածքում որևէ շինության կառուցումը: Կառուցելու համար թույլտվություն սատանալու ընթացակարգ կա՝ դիմում են գրում, դա ուսոմնասիրվում է և որոշվում՝ մերժել թե ընդունել»,- ասաց քաղաքապետարանի ներկայացուցիչը: