Մայիսի 1-ին Կողբ համայնքում տեղի է ունեցել բարեգործական ծառատունկ՝ նվիրված «Կողբ» հիմնադրամի 7-ամյակին, որից ստացված հասույթն ուղղվելու է Կողբ սահմանամերձ համայնքում Թումո ստեղծարար կենտրոնի շինարարական աշխատանքներն ավարտին հասցնելուն։
Ծառատունկին մասնակցել են մարզպետ Հայկ Ղալումյանը, մարզպետարանի աշխատակիցներ, Նոյեմբերյանի տարածաշրջանի համայնքների վարչական ղեկավարներ, համայնքապետեր և քաղաքացիներ:
Կողբում գտնվող «Զիկատար» պետական արգելավայրում ավելի քան 5 հա տարածքում տնկվել է շուրջ 7000 ծառ։ Մարզպետ Հայկ Ղալումյանը և միջոցառման մասնակիցներն այցելել են նաև Թումո կենտրոնի շինհրապարակ և Կողբի գեղարվեստի դպրոց:
Թումո կենտրոնի կառուցումը Կողբում իրականացվում է «Սիմոնյան» կրթական հիմնադրամի հետ համատեղ։ Կենտրոնից անվճար կօգտվի ինչպես Կողբ, այնպես էլ հարևան Նոյեմբերյան, Բերդավան և այլ քաղաքներում ու գյուղերում բնակվող 1000-ից ավելի պատանի: Նախկին դրամահավաքների շնորհիվ արդեն ավարտվել են շենքի բետոնային աշխատանքները:
