Առաջիկայում հնարավոր կլինի հայտնել, թե Հայաստանում կորոնավիրուսային հիվանդության դեմ քանի օտարերկրացի է պատվաստվել: Այս մասին այսօր լրագրողների հետ զրույցում ասաց առողջապահության նախարարի պաշտոնակատար Անահիտ Ավանեսյանը՝ անդրադառնալով այն հարցին, թե որքա՞ն է պատվաստվող օտարերկրացիների թիվը:
«Տարվում է վիճակագրություն, հավաքագրվում են փաստաթղթեր, առանձին հաշվարկ է արվում»,- ասաց նա: Ըստ նրա՝ պատվաստված օտարերկրացիների թիվը այսուհետ կներկայացվի ամեն ամսվա վերջ:
Ավանեսյանը նշեց՝ հավաքագրելու որոշումը պայմանավորված է վարչապետի պաշտոնակատարի հանձնարարականով այն բանից հետո, երբ զբոսաշրջիկների համար մեր երկրում քովիդի դեմ պատվաստվելու դեպքում հուլիսի 15-ից սկսեց գործել նոր սահմանափակում, որի համաձայն՝ կորոնավիրուսային հիվանդության դեմ պատվաստվելու համար նրանք պետք է Հայաստանում բնակվեն առնվազն 10 օր:
Հայաստանում վերջին ամիսներին քովիդի դեմ պատվաստվելու համար, ինչպես բազմիցս անդրադարձել ենք, Հյուսիսային պողոտայում իրանցի զբոսաշրջիկների անծայրածիր հերթեր էին գոյանում: Նրանք պատվաստվելու իրենց հերթի համար նույնիսկ գիշերում ու լուսացնում էին պողոտայում: Իրանցիները նշում էին, որ իրենց մոտ պատվաստում են դեռևս տարեցներին, այդ պատճառով գալիս էին և պատվաստվում մեր երկրում, բայց միայն «Աստրազենեկա» պատվաստանյութով: Նախարարի պաշտոնակատարի խոսքով՝ օտարերկրացիներին առաջարկվել է այդ պատվաստանյութը՝ հաշվի առնելով մեր երկրի հնարավորությունները: Սակայն նոր սահմանափակումից հետո իրանցիների մեծ հերթեր պողոտայում այլևս չես հանդիպի, քանի որ ոչ բոլորին է հարմար 10 օր բնակվել Հայաստանում:
Հայաստանում պատվաստումներն իրականացվում են երեք պատվաստանյութերով՝ «ԱստրաԶենեկա»-ով, «Սպուտնիկ-Վի»-ով և «Կորոնավակ»-ով, 18 և բարձր տարիքի անձանց շրջանում՝ ըստ դիմելիության, կամավորության սկզբունքով: Պատվաստումներն իրականացվում են առողջության առաջնային պահպանման կազմակերպություններում շաբաթվա բոլոր օրերին: Քովիդի դեմ պատվաստվելն անվճար է: Մինչ այս պահը քովիդի 152 հազար 529 պատվաստում է արվել, թե դրանցից քանիսն են կազմում օտարերկրացիները, նախարարությունը դեռևս դժվարանում է հայտնել:
