Հայ-ռուսական դիվանագիտական հարաբերությունների 30-ամյակին նվիրված միջոցառումների շրջանակում Վ․ Բրյուսովի անվան պետական համալսարանը հյուրընկալել է Հայաստանում Ռուսաստանի Դաշնության դեսպան Սերգեյ Կոպիրկինին, դեսպանատան աշխատակիցներին, Երևանում Մոսկովյան «Դոմ Մոսկվի» մշակութագործարարական կենտրոնի տնօրեն Վահրամ Կարապետյանին, ինչպես նաև «Ռուսկի Դոմ» Ռուսաստանի գիտության և մշակույթի կենտրոնի ղեկավար Վադիմ Ֆեֆիլովին:
Ռեկտոր Կ. Հարությունյանը դեսպան Կոպիրկինին ներկայացրեց ԲՊՀ-ում ռուսերեն ուսումնառող ուսանողների քանակը, ինչպես նաև այն մասնագիտությունների ցանկը, որտեղ ռուսերենը սովորում են թե՛ որպես մասնագիտական լեզու, թե՛ որպես երկրորդ կամ երրորդ օտար լեզու:
Ռեկտորն ընդգծեց, որ ԲՊՀ-ն համագործակցում է ռուսական մի շարք բուհերի հետ, ԱՊՀ ցանցային համալսարանների մաս է, և համաձայնագրի շրջանակներում սերտորեն համագործակցում է «Ժողովուրդների բարեկամության ռուսաստանյան համալսարանի» (РУДН) հետ, համատեղ մագիստրոսական ծրագրեր են իրականացվում: Ներկայացվեցին նաև ռուսական այլ բուհերի հետ համագործակցության առանձնահատկությունները:
Դեսպանին տեղեկություն տրամադրվեց նաև համալսարանում ռուսաց լեզվի ուսուցիչների վերապատրաստման դասընթացների անցկացման առկա փորձի, ինչպես նաև եկող ուսումնական տարվանից սկսած արդեն երկու օտար լեզվի ուսուցիչներ պատրաստելու վերաբերյալ վերջերս ստացած թույլտվության մասին:
Հանդիպման մյուս հատվածում Ս. Կոպիրկինն այցելեց Վ. Բրյուսովի թանգարան, որտեղ ԲՊՀ գրադարանի գիտական համակարգող Դ. Սարաֆյանը հանգամանալի ներկայացրեց թանգարանում առկա ժառանգությունը՝ Վ. Բրյուսովի մեծարժեք գործունեության մանրամասնումով: Դեսպան Կոպիրկինը հուշամատյանում գրություն կատարեց՝ կիսվելով թանգարանում ստացած իր տպավորություններով:
Այնուհետև դեսպանի հետ հանդիպեցին ԲՊՀ դասախոսներն ու ուսանողները: Հանդիպման այս հատվածում ռեկտոր Կ. Հարությունյանը և դեսպան Կոպիրկինը երկուստեք ողջունեցին ներկաներին՝ բարձր գնահատելով Հայ-ռուսական դիվանագիտական հարաբերությունները և երկու ժողովուրդների դարավոր բարեկամությունը:
Դեսպան Կոպիրկինն ասաց, որ այն, ինչ անում է Ռուսաստանը Հայաստանում, Հայաստանի համար, մեծ ռազմավարական նշանակություն ունի: Հայաստանի և Ռուսաստանի ռազմավարական և խորքային շահերը համընկնում են:
«Մենք ավանդաբար նման գործունեությունը չենք դիտարկել որպես փիարի տարր։ Մեզ համար Հայաստանը, հայ ժողովուրդը մեր եղբայրներն են, որոնց հետ շատ բան է կապված»,- ասաց նա՝ կարևորելով, որ այս տարիների ընթացքում հայկական և ռուսական կողմից միշտ եղել և մնացել են մարդիկ, ովքեր խորապես մտածում են երկու երկրների հարաբերությունների մասին:
«Հենց այս մարդիկ են կազմում այն հոգեւոր կորիզը, որը միավորում է երկու երկրներին: Չնայած մեր երկրների առջև ծառացած բոլոր դժվարություններին և մարտահրավերներին, այս միջուկը բավականաչափ ամուր է, որպեսզի երկկողմ հարաբերությունները հաղթահարեն բոլոր մարտահրավերները, և ժողովուրդները շարունակեն ապրել և գործել միասին՝ պահպանելով մշակութային և հոգևոր ընդհանուր ավանդույթները»,-ասաց նա։
Սերգեյ Կոպիրկինը Ռուսաց լեզվի և մշակույթի (ՌԼՄԿ) կենտրոնի ղեկավար, բ. գ. դ., պրոֆեսոր Միխայիլ Ամիրխանյանին անձամբ փոխանցեց «Ռուսաստանի և Հայաստանի միջև մշակութային և հումանիտար կապերի զարգացման գործում մեծ ավանդի համար» ՌԴ նախագահի կողմից տրված Պուշկինի անվան պատվո մեդալը:
Հանդիպումն անցավ ակտիվ հարց ու պատասխանի մթնոլորտում: