ՀՀ ֆինանսների նախարարի տեղակալ Արման Պողոսյանի հավաստմամբ` օրենսդրական նախաձեռնության ընդունմամբ կվերանայվեն ծխախոտի արտադրանք համարվող տարբեր ապրանքատեսակների ակցիզային հարկով հարկման մոտեցումները եւ կկարգավորվեն որոշ ապրանքների ներմուծումն ավելացված արժեքի հարկից ազատելու հետ կապված խնդիրները:

Գործող իրավակարգավորմամբ էլեկտրոնային ծխախոտի արտադրանքն (ԱՏԳ ԱԱ 2404 12 000 0 եւ 2404 19 000 ծածկագրեր) ակցիզային հարկով չհարկելու դեպքում նվազում են նաեւ այլ ծածկագրերին դասվող ծխախոտի արտադրանքի սպառման ծավալները, ինչը հանգեցնում է պետական բյուջեի եկամուտների նվազման: Հարկային օրենսգրքում փոփոխություններով Կառավարությունն առաջարկում է էլեկտրոնային ծխախոտը հարկել ակցիզային հարկով` 2022 թ. ընթացքում 1մլ համար` 50 դրամ, իսկ 2023 թ. ընթացքում 1 մլ համար` 55 դրամ, ինչպես նաեւ այդ ապրանքները դրոշմավորել դրոշմապիտակով, հավասարեցնել ԱՏԳ ԱԱ 2206 ծածկագրին դասվող սիդրի եւ նույն ծածկագրին դասվող խմիչքների ակցիզային հարկի դրույքաչափերը:

Առաջարկվում է նաեւ օրենքի 1-ին հոդվածով սահմանված ցանկից հանել ԱՏԳ ԱԱ 84 եւ 85 խմբերի ապրանքատեսակները, ավելացված արժեքի հարկից ազատել ԱՏԳ ԱԱ 1404 90 000 8 ծածկագրին դասվող ապրանքների ներմուծումը:

Նշվել է, որ Կառավարությանը կվերապահվի իրավասություն սահմանելու ՀՀ միջազգային պայմանագրերով նախատեսված հարկային արտոնությունների կիրառության կարգը:

Ըստ փոխնախարարի` էլեկտրոնային ծխախոտի օգտագործումը նույնպես վնաս է առողջությանը, որի մասին են փաստում մի շարք առողջապահական հետազոտություններ:

Արման Պողոսյանը, պատասխանելով պատգամավորների հարցերին, փաստել է, որ ներկայացված փաթեթով նոր տուրքեր չեն սահմանվում. տվյալ ապրանքատեսակի համար կկիրառվի տուրքի չափ: Նշվել է նաեւ, որ առաջին ընթերցումից հետո կսահմանվեն ապրանքատեսակների իրացման հստակ ժամկետներ: Իսկ որոշակի իրավական հարցերի առնչությամբ մասնագետների մասնակցությամբ առաջիկայում կկազմակերպվի քննարկում:

Փոխնախարարը պատրաստակամություն է հայտնել ներկայացված մի շարք առաջարկությունների վերաբերյալ գործակցել ԱԺ փորձագիտական եւ վերլուծական վարչության հետ:

Քննարկման արդյունքում օրենսդրական փաթեթը ստացել է դրական եզրակացություն:

««Կազմակերպությունների եւ անհատ ձեռնարկատերերի կողմից ներմուծվող` ակցիզային հարկով հարկման ոչ ենթակա այն ապրանքների ցանկը հաստատելու մասին, որոնց ներմուծումն ազատված է ավելացված արժեքի հարկից» Հայաստանի Հանրապետության օրենքում լրացումներ եւ փոփոխություններ կատարելու մասին» նախագիծը քննարկվել է ԱԺ տնտեսական հարցերի մշտական հանձնաժողովի հոկտեմբերի 19-ի նիստում: