Սահմանադրական դատարանը հեռացել է խորհրդակցական սենյակ՝ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումի վերաբերյալ որոշում կայացնելու: Վիճարկվում է Քրեական օրենսգրքի 300.1 հոդվածի` Սահմանադրությանը համապատասխանելու հարցը։ Հոդվածը վերաբերում է սահմանադրական կարգը տապալելուն, որի հիմքով մեղադրանք է առաջադրվել երկրորդ նախագահին։ Քննությունից առաջ ՍԴ դատավոր Արևիկ Պետրոսյանը միջնորդել է գործը քննել բանավոր ընթացակարգով՝ հաշվի առնելով դրա հանրային հնչեղությունը։ Առաջարկին առարկել է Երվանդ Խունդկարյանը։ Քվեարկության ժամանակ ՍԴ 8 անդամների ձայները հավասար են բաշխվել՝ 4-4, ինչի արդյունքում որոշվել է գործը քննել գրավոր ընթացակարգով։ Այսօրվա նիստին մասնակցել են ՍԴ 9 դատավորներից 8-ը․ Վահե Գրիգորյանի վերաբերյալ կայացվել էր մասնակցության անհնարինության մասին որոշում, քանի որ վերջինը մինչև դատավոր նշանակվելը եղել է մարտի 1-ի գործով տուժածների իրավահաջորդը
Երևանի ընդհանուր իրավասության դատարանում էլ այսօր շարունակվել է Հայաստանի երկրորդ նախագահ Ռոբերտ Քոչարյանի և մյուսների գործով դատական նիստը։ Շուրջ 1,5 տարի տևած դատավարությունից հետո դատավոր Աննա Դանիբեկյանն այսօր հայտարարել է, որ գործը մտնում է դատաքննության փուլ: Մինչև դատավորի այս հայտարարությունը պաշտպանական կողմը մի քանի միջնորդություններ ու բացարկներ է ներկայացրել։ Մասնավորապես՝ առաջարկել է հետաձգել այսօրվա նիստը մինչև ՍԴ-ի որոշման հրապարակումը։ Դատավոր Աննա Դանիբեկյանը, սակայն, որոշել է անցնել դատաքննության փուլին, ինչից հետո պաշտպանները լքել են նիստերի դահլիճը։ Դատական հաջորդ նիստին, որը նշանակվել է մարտի 30–ին, դատախազությունը կներկայացնի մեղադրական եզրակացությունը:
2008-ի մարտի 1-ի գործով Ռոբերտ Քոչարյանի և մյուսների դատավարությունը սկսվել է 2019-ի սեպտեմբերին։ Թեև գործը քննվում է արդեն մեկուկես տարի, բայց դատաքննության փուլ դեռ չի հասել։ Մեղադրող կողմը պաշտպաններին մեղադրում է միջնորդություններով դատավարությունը ձգձգելու մարտավարություն որդեգրելու մեջ:
