Ուրուգվայի Ներկայացուցիչների պալատը, ապրիլի 24-ը ‹‹Հայոց ցեղասպանության հիշատակի օր›› հայտարարելու օրենքի նախագծին կողմ քվեարկելուց զատ, մայիսի 14-ին կայացած նիստի շրջանակներում քվեարկել է նաև նույն օրը վերոնշյալ օրենքի նախագիծը կառավարությանը փոխանցելու օգտին, ինչը նշանակում է, որ գործադիրի հաստատումից հետո 10 օրվա ընթացքում այն հրապարակվելու է պաշտոնական տեղեկագրում և նույն պահից ուժի մեջ է մտնելու: Այս մասին տեղեկացնում է Ուրուգվայում Հայաստանի դեսպանության «Ֆեյսբուք»-ի էջը։
«Մայիսի 14-ին Ուրուգվայի Ներկայացուցիչների պալատը միաձայն՝ նիստին ներկա 74 պատգամավորների 74 կողմ քվեներով ընդունեց հրատապ կարգով քվեարկության դրված օրենքի նախագիծը, որով ապրիլի 24-ը հայտարարվում է ‹‹Հայոց ցեղասպանության հիշատակի օր›› և բոլոր պետական հեռուստա և ռադիոալիքները պարտավորվում են այսուհետ յուրաքանչյուր տարի ապրիլի 24-ին միաժամանակ անդրադառնալ Հայոց ցեղասպանության թեմային:
Նիստի ընթացքում, որին ներկա է գտնվել նաև դեսպանության գործերի ժամանակավոր հավատարմատար Մարիամ Գևորգյանը, ելույթներով են հանդես եկել պատգամավորներ Պեդրո Խիսդոնյանը,Կարլոս Վարելան, Ռաֆաել Մենենդեսը, Իվան Պոսադան, Մարիա Ռոսեժոն, Ֆելիպե Ալգորտան, Ուգո Կամարան, Ուբալդո Աիտան և Խուան Ռոդրիգեսը:
Պատգամավորներն իրենց խոսքում կարևորել են օրենքի ընդունումը մարդկության դեմ գործված հանցագործությունների դատապարտման, այդպիսով դրանց կրկնությունը կանխելու և ժխտողականությունը մերժելու տեսանկյունից: Նշել են, որ անպատժելիության պայմաններում Ադրբեջանը նախորդ տարի իրականացրեց Լեռնային Ղարաբաղի 120.000 հայերի բռնի տեղահանումը, իսկ այսօր էլ շարունակում է մշակութային ցեղասպանությունը՝ ոչնչացնելով Լեռնային Ղարաբաղում հայկական մշակութային ժառանգությունը: Պատգամավորներն ընդգծել են, որ իրենց համար հպարտություն է, որ Ուրուգվայն առաջինն է ճանաչել Հայոց ցեղասպանությունը, իսկ այժմ էլ դառնում է առաջին երկիրն աշխարհում, որն օրենքի ուժով պարտավորեցնում է պետական բոլոր հեռուստա և ռադիոալիքներին յուրաքանչյուր տարի ապրիլի 24-ին միաժամանակ անդրադառնալ Հայոց ցեղասպանության թեմային: Ուրուգվայցի օրենսդիրները նաև առանձնահատուկ ողջունել են ուրուգվայահայ համայնքին՝ համերաշխություն հայտնելով նրան և գովասանքի խոսքեր հնչեցնելով վերջինիս հասցեին:
Նիստի շրջանակներում պատգամավորները քվեարկել են նաև նույն օրը վերոնշյալ օրենքի նախագիծը կառավարությանը փոխանցելու օգտին, ինչը նշանակում է, որ գործադիրի հաստատումից հետո 10 օրվա ընթացքում այն հրապարակվելու է պաշտոնական տեղեկագրում և նույն պահից ուժի մեջ է մտնելու:
Հարկ է ընդգծել, որ ի տարբերություն 1965 թ. ընդունված 13.326 օրենքի, որում նշվում էր, որ հաջորդ տարվա ապրիլի 24-ը հայտարարվում է ‹‹Հայ նահատակների հիշատակի օր››, երեկ ընդունված օրինագծում հստակ նշվում է ‹‹ցեղասպանություն›› բառը և խոսք է գնում ոչ միայն հաջորդ տարի, այլ՝ այսուհետ յուրաքանչյուր տարի ապրիլի 24-ին այն հիշատակելու մասին»,- ասվում է հաղորդագրության մեջ:
