Այսօր՝ ժամը 18:00-ին, Սահմանադրական դատարանում ավարտվեց հունիսի 20-ի ընտրությունների արդյունքների բողոքարկման քննությունը, այն կշարունակվի վաղը՝ ժամը 10:00-ին: ՍԴ նախագահ Արման Դիլանյանը այսօրվա նիստի ավարտին «Հայաստան» դաշինքի ներկայացուցիչ Արամ Վարդեւանյանից հետաքրքրվեց, թե դեռ որքա՞ն ժամանակ է անհրաժեշտ իրեն՝ զեկույցն ավարտելու համար: Վարդեւանյանը, որ շուրջ 1 ժամ արդեն զեկույցը ներկայացնում էր, տեղեկացրեց, որ 40 րոպե էլ անհրաժեշտ է: Որոշվեց վաղը լսել շարունակությունը:
Նշենք, որ իր զեկույցում Արամ Վարդևանյանը անդրադարձավ ՍԴ ներկայացված դիմումի հիմքերին: Անդրադառնալով ՀՀ նախագահին՝ ՍԴ նիստին որպես վկա հրավիրելու միջնորդությանը՝ Վարդևանյանն ասաց. «Ընտրությունները եղել են հունիսի 20-ին, բայց մարտի 18-ին Նիկոլ Փաշինյանը հայտարարել է, որ հունիսին 20-ին տեղի կունենան արտահերթ խորհրդարանական ընտրություններ: Շատ կարևոր է՝ վերջինս ոչ թե ստանձնել է նախագահի կողմից հայտարարությունները փոխանցելու գործառույթ, այլ հայտարարել է իր անունից: Կարծում եմ՝ ակնհայտ է, որ նույն երևույթը չէ: Սահմանադրությամբ գրված է, որ հայտարարողը Հանրապետության նախագահն է»:
«Հայաստան» դաշինքի ներկայացուցիչը խնդիր համարեց նաեւ այն, որ ապրիլի 25-ին հրաժարական տալով՝ վարչապետ Նիկոլ Փաշինյանը շարունակել է իր պարտականությունները կատարել: Ըստ նրա՝ այստեղ խնդիր կարող է լինել վարչական ռեսուրսի հնարավոր չարաշահման մասին:
Խոսելով զինծառայողների քվեարկության մասին՝ Վարդեւանյանը ընդգծեց, որ վկայի կարգավիճակով պետք է հրավիրել ԶՈՒ ԳՇ պետին՝ պարզելու, թե արդյոք իսկապե՞ս 10 հազար 993 զինծառայող է մասնակցել քվեարկությանը:
