Հայաստանի երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը վստահ է, որ իր ղեկավարած դաշինքը կարողանալու է երկիրն արագ քայլերով առաջ տանել: Այս մասին նա խոսեց Վեդիում քաղաքացիների հետ հանդիպման ժամանակ:
Լսելով հավաքված քաղաքացիներին և պատասխանելով նրանց բարձրացրած հարցադրումներին՝ նա խոսեց գյուղատնտեսական ոլորտում իրենց անելիքների մասին: Մասնավորապես, նա անդրադարձավ ոռոգման խնդիրներին՝ հայտարարելով, որ երեք տարով փոխելու են սուբսիդավորման մակարդակը: «Հաշվարկը դեռ վերջնականացված չէ, բայց կարծում եմ երեք տարով դուք սիմվոլիկ գումարներ եք ունենալու ոռոգման համար: Գիտեմ, որ շատերն են վարկերի տակ, այս տնտեսական անկումը բերեց անհամաչափության, վարկավորման փաթեթի աճի, ֆինանսական այդ ծանրության տակից դժվար է դուրս գալ առանց աջակցության»,- ասաց Քոչարյանը:
Անդրադառնալով սպորտի զարգացմանը՝ նա տարանջատեց մեծ սպորտը և մասսայական սպորտը: «Չունենանք մասսայական սպորտ, չենք ունենալու նաև մեծ սպորտ: Մի սպորտաձևով առնվազն 8-10 հազար երեխա պետք է պարապի, որպեսզի մեծ սպորտի համար կարողանաս առաջ տանել մի քանիսին: Մեկը սնում է մյուսին, չես կարող միայն մեկ սպորտ դպրոց կառուցել՝ մտածելով, որ հաջողություն ես ունենալու: Իսկ մասսայական սպորտը ժողովրդի առողջությունն է»,- նշեց Հայաստանի երկրորդ նախագահը:
Քոչարյանը կրկնեց, որ իրենք են այն քաղաքական ուժը, որն ունի փորձ, վճռականություն, գիտելիք և կամք: «Եթե վստահեք մեզ, մենք կկոտրենք այս անկումային տրամադրությունները և առաջ կքայլենք արագ տեմպերով: Վստահ եմ: Հակառակ դեպքում, ես այս բեռի տակ չէի մտնի: Մենք արդարացնելու ենք ձեր վստահությունը»,- եզրափակեց «Հայաստան» դաշինքի վարչապետի թեկնածու Ռոբերտ Քոչարյանը:
