ԱԺ-ում ՀՀ վարչապետ Նիկոլ Փաշինյանի հետ հարցուպատասխանի ընթացքում «Իմ քայլը» լքած, անկախ պատգամավոր դարձած Գոռ Գևորգյանը նշեց, որ ամաչում է այն հնչած ծափահարությունների համար, որոնք քիչ առաջ եղել են ԱԺ-ում:
Նշենք, որ «Իմ քայլի» պատգամավորներն Ազգային ժողովում հոտնկայս ծափահարեցին վարչապետ Նիկոլ Փաշինյանին, որը ամբիոնից ներկայացնում էր Կառավարության ծրագրի 2020 թվականի կատարման ընթացքի և արդյունքների մասին զեկույցը։
«Մենք ունենք հազարավոր զոհեր, գերիներ, դեռ չխնկարկված մարմիններ: Դուք՝ որպես վարչապետ, պետք է ձեր թիմակիցներին գոնե փորձեիք սաստել»:
Այնուհետև Գոռ Գևորգյանը հարց հնչեցրեց՝ Օնիկ Գասպարյանի հայտարարության և պատերազմը կանգնեցնելու մասին, սակայն վարչապետը անկախ պատգամավորի հարցերին չպատասխանեց՝ նշելով. «Եթե դուք ամաչում եք այն փաստից, որ խորհրդարանի մեծամասնությունը հավատում է ՀՀ-ի, Արցախի ապագային, ապա դա ձեր խնդիրն է: Ձեր շուրթերից «ձեր թիմակիցներ» արտահայտությունը շատ խորհրդանշական է: Ո՞նց եք եկել այստեղ, նստել, որտեղի՞ց եք եկել, ո՞վ եք, ես ձեր հարցերին հարկ չեմ համարում պատասխանել»,- ինչից հետո իշխող ուժի պատգամավորները կրկին ծափահարեցին:
«Եթե դուք ասում եք՝ ձեր թիմը, դուք նստած հարց տալու իրավունք չունեք: Այո՛, մենք ծափահարում ենք այն մարդկանց, ովքեր հավատում են ՀՀ-ի ու Արցախի ապագային: Մենք ծնկաչոք ենք հիշատակում մեր նահատակներին, ձեր էժան գործելակերպը դադարեցրեք, հիշեք՝ որտեղից եք եկել ու ոնց, արագ ձեզ ինքնահայեցման ենթարկեք»,- ասաց Փաշինյանը:
