Նախկին ԱԱԾ-ականներ Միքայել Համբարձումյանը, Վրեժ Արզումանյանը եւ Հրանտ Եպիսկոպասյանը ԱԱԾ պահեստազորի սպաների միություն են հիմնել: Ինչպես նշված է նրանց տարածած հաղորդագրության մեջ միության նպատակներից մեկը սպայակազմի փորձն ու հմտությունը, մասնագիտական իմացությունն այսուհետ ևս երկրին, նրա անվտանգային խնդիրներին ծառայեցնելն է:
Կազմակերպությունը հիմնադրվել է սույն թվականի ապրիլի 15-ին:
«Կազմակերպության նպատակն է
-պահեստազորում գտնվող սպաների՝ հայրենիքի նվիրյալ զինվորների, բարձր հեղինակությունը պահպանելն ու դրան աջակցելը,
-սպայակազմի փորձն ու հմտությունը, մասնագիտական իմացությունն այսուհետ ևս երկրին, նրա անվտանգային խնդիրներին ծառայեցնելը,
-ոլորտում բարեփոխումների իրականացմանն օժանդակելը, նրա դինամիկ զարգացումն ապահովելը,
-պահեստազորային սպայակազմի շահերը, իրավունքները պետական ու տեղական ինքնակառավարման մարմիններում ու կազմակերպություններում, դատական ատյաններում սպասարկելը։
Կազմակերպությունը բաց է անդամակցելու ցանկություն ունեցող պահեստազորի սպաների առաջ»,- մասնավորապես ասված է հայտարարության մեջ։
Հիշեցնենք, որ Միքայել Համբարձումյանը ժամանակավոր պաշտոնակատար էր նշանակվել հոկտեմբերի 8-ին` ԱԱԾ տնօրեն Արգիշտի Քյարամյանի պաշտոնանկությունից հետո։ Մեկ ամիս անց նա ազատվել է պաշտոնից: Հրանտ Եպիսկոպոսյանը զբաղեցնում էր ԱԱԾ տնօրենի առաջին տեղակալի պաշտոնը: Սերժ Սարգսյանի հրամանագրով նա այդ պաշտոնից ազատվել է 2016 թվականին: Գեներալ-լեյտնենանտ Վրեժ Արզումանյանը, որը զբաղեցնում էր ԱԱԾ տնօրենի տեղակալի պաշտոնը, ազատվել է 2018 թվականի հունիսին:
