Հունիսի 7-ից մեկնարկում է հունիսի 20-ին կայանալիք արտահերթ խորհրդարանական ընտրությունների պաշտոնական քարոզարշավը, չնայած քաղաքական ուժերն այս ընթացքում եւս քարոզչությամբ զբաղվում էին: Ընտրություններում մասնակցում է 26 քաղաքական ուժ՝ 22 կուսակցություն եւ չորս դաշինք:
Քաղաքական ուժերից շատերն արդեն հստակ գիտեն, թե այս 12 օրերի ընթացքում որտեղ են լինելու եւ ինչպես են քարոզարշավ իրականացնելու: ՀՀ վարչապետի պաշտոնակատար Նիկոլ Փաշինյանը Քաղաքացիական պայմանագիր կուսակցության անդամների հետ կլինի Արմավիրի մարզի Էջմիածին քաղաքում:
Հայաստան դաշինքը՝ Ռոբերտ Քոչարյանի գլխավորությամբ քարոզարշավը սկսի Սյունիքի մարզի Քաջարան քաղաքից, իսկ Լուսավոր Հայաստան կուսակցությունը՝ Էդմոն Մարուքյանի գլխավորությամբ՝ Սյունիքի մարզի Ագարակ համայնքից: ԲՀԿ-ն էլ 18:00-ին Գագիկ Ծառուկյանի գլխավորությամբ կլինի Աբովյան համայնքում, մինչ այդ էլ կներկայացնեն իրենց նախընտրական ծրագիրը: