«Ես նույնպես լսել եմ այդ տեղեկությունները և ծանոթացել մամուլի հրապարակումներին, որոնց մասին դուք նշեցիք։ Բայց կարծում եմ՝ ճիշտ կլինի, որ հենց պարոն Առաքելյանը մեկնաբանություն տա այդ մասին և պարզաբանի՝ ի՞նչ է պատրաստվում անել»:
Այսօր ԱԺ-ում ասաց Լիլիթ Մակունցն՝ անդրադառնալով Աշխատանքի և սոցիալական հարցերի արդեն նախկին նախարար Մեսրոպ Առաքելյանի հրաժարականին, և այն տեղեկություններին, որ «Առաքելությունը» պատրաստվում է առանձին հանդես գալ այս ընտրություններին:
Խոսելով «Իմ քայլ»-ի պատգամավոր Նարեկ Մկրտչյանի մանդատը վայր դնելու և գործադիրում նշանակվելու մասին, և հարցին՝ Նարեկ Մկրտչյա՞նն է նշանակվելու աշխատանքի և սոցիալական հարցերի նախարար, Մակունցը հստակ չպատասխանեց. «Չեմ կարող ասել՝ կնշանակվի նախարարի պաշտոնում, թե փոխնախարարի պաշտոնում»,- և հավալեց, որ տեղյակ չէ, թե ով է լինելու հաջորդ նախարարը:
Այսօր հայտնի դարձավ, որ Աշխատանքի եւ սոցիալական հարցերի նախարար Մեսրոպ Առաքելյանը հրաժարականի դիմում է ներկայացրել:
Հիշեցնենք, որ Մեսրոպ Առաքելյանը «Առաքելություն» կուսակցության վարչության անդամ է, որը «Քաղաքացիական պայմանագրի» հետ միասին կազմում է «Իմ քայլը» դաշինքը: Մեսրոպ Առաքելյանի կուսակից փոխնախարարից՝ Դավիթ Խաչատրյանից ՀԺ-ն հետաքրքրվեց՝ ինքը ե՞ւս պատրաստվում է հրաժարական տալ: Հարցրեցին նաեւ, թե նախարարի հրաժարականն արդյոք պայմանավորվա՞ծ է առաջիկա ընտրություններին «Առաքելություն» կուսակցության հնարավոր առանձին մասնակցությամբ. «Ոչ մեկ հավետ չի իր պաշտոնում, ես շարունակում եմ աշխատել: Պարոն Առաքելյանը իր հրաժարականի տեքստում խոսել է այդ մասին, ավելացնելու բան չունեմ»,- ասաց Խաչատրյանը՝ հավելելով, որ ընտրությունների հետ կապված կուսակցությունը պատեհ պահին հայտարարություն կանի:
Մամուլում լուրեր են շրջանառվում, թե «Առաքելությունը» պատրաստվում է առանձին ցուցակով մասնակցել հունիսի 20-ին սպասվող ընտրություններին եւ այդ ցուցակը գլխավորելու է Արցախի սոցիալական հարցերի նախարար Մանե Թանդիլյանը: Փոխնախարարը չցանկացավ այս կապակցությամբ մեկնաբանություն տալ:
Ավելի վաղ ՀԺ-ն զրուցել էր Դավիթ Խաչատրյանի հետ, ով իրենց կուսակցության ու ՔՊ-ի դաշինք կազմելու մասին հարցին ի պատասխան նշել էր, որ չի տեսնում որևէ պատճառ համագործակցության դաշինքային ֆորմատը վերանայելու համար և ընգծել էր, որ քննարկում այդ թեմայով դեռևս չեն ունեցել: Սակայն ԱԺ-ում լրագրողների հետ զրույցում ԱԺ փոխնախագահ Ալեն Սիմոնյանը նշել էր, որ իր կարծիքով ճիշտ կլինի, եթե «Քաղաքացիական պայմանագիր» կուսակցությունը ընտրությունների գնա միայնակ, ոչ թե դաշինքով:
