Խորհրդարանում պատգամավոր Թագուհի Թովմասյանն այսօր վարչապետ Նիկոլ Փաշինյանից հետաքրքրվեց պատերազմը վարելու մասին մեկնաբանությունների և թերութունների մասին։ Մասնավորապես այն, որ վարչապետի հրամանով է տեղի ունեցել զորակոչի դադարը՝ այն պայմաններում, երբ մարտակոչով էր հանդես գալիս։
Պատգամավորը հիշեցրեց, որ «Մարտունի 3» զորամասի 7-րդ վաշտի զինվորների ծնողները Փաշինյանի հետ հանդիպման ժամանակ բարձրաձայնել են, որ պատերազմում կազմակերպչական մի շարք թերություններ են եղել և երեխաներին Հադրութ են տեղափոխել այն հանձնելուց երկու օր անց։
Փաշինյանն էլ ի պատասխան նշեց. «Պատկերացնո՞ւմ եք մի իրավիճակ՝ ուղիղ եթերում մարտակոչով հանդես ես գալիս, հետո հենց ուղիղ եթերը դադարում է, գնում ես, հեռախոսը վերցնում՝ ասում ես՝ դադարեցրեք։ Այսինքն՝ այդ հայտարարությունը անհեթեթ է, և այդ հայտարարության հեղինակը մեծ պրոբլեմ ունի։ Գիտե՞ք որն է այդ խնդիրը, երբ նա բարձրաստիճան զինվորական լինելով՝ փորձում էր հանձնել 7-րդ պաշտպանական շրջանը, ես այս դահլիճում ներկա մի շարք մարդկանց ներկայությամբ կայացրել եմ որոշում, որի արդյունքում 7-րդ պաշտպանական շրջանը մինչև այսօր հայկական զինված ուժերի տրամադրության տակ է։ Եվ ասեմ, որ պատերազմի ընթացքում դա միակ ռազմականին մոտ որոշումն է եղել, որը ես կայացրել եմ։ Եվ այդ մարդը, որը կիսահիստերիկ վիճակում օր ու մեջ հարցազրույց է տալիս և գեներալ-գնդապետի ուսադիրներով իր հիմնական օպոնենտ է համարում կնոջը, դուք գիտեք՝ ում կնոջը, էդ մարդը, կարծում եմ, ընդհանրապես բազմաթիվ խնդիրներ ու բարդույթներ ունի։ Եվ ինքը դեռ շատ հարցերի պետք է պատասխան տա: Այդ մարդուն, իմիջիայլոց, արժե անվանել 7-րդ պաշտպանական շրջանի արծիվ, թե ոնց էր հազարի տակ ուզում փախնել ու բոլորին փախցնել այնտեղից, չնայած արծիվները չեն վազում, ջայլամներն են ավելի լավ վազում»:
Փաշինյանն ընգծեց՝ անհեթեթ են նաև այն խոսակցությունները, թե ինքն է ասել պետք է գրավել «Լելե Թեփեն».
«Ասում են՝ Սերժ Սարգսյանը «Լելե Թեփեն» հանձնել է, ես ասել եմ՝ գնացեք գրավեք, և այդ համատեքստում 700 զոհ է եղել, կատարյալ անհեթեթություն: Այդ օպերացիայի առաջարկի հեղինակը եղել է գեներալ, այդ առաջարկը ընդունելի է համարել գեներալ, այդ առաջարկը կյանքի կոչելու հնարավորության գնահատումը իրականացրել է գեներալ և որոշումը կայացրել է գեներալ և ընդ որում այնպիսի գեներալներ, որոնք այդ պահին ունեին այդ որոշումը իրականցնելու հնարավորություն: Ես այդ խոսակցությունը մոդեռացիա եմ արել, հարցրել եմ՝ դու ինչ կարծիքի ես, այս մեկն ինչ կարծիքի է և ամենաբարձրաստիճանին եմ հարցրել, դու ինչ կարծիքի ես, ասել է՝ լավ միտք է: Հետո տվել է հանձնարարական, ու զեկուցել է՝ այո, դա պետք է անել, և կարելի է»:
