«Բարգավաճ Հայաստան» կուսակցությունը առաջիկա արտահերթ խորհրդարանական ընտրություններում հաջողության հասնելու դեպքում խոստանում է ապահովել անվտանգություն, մարդկանց համար՝ բարեկեցիկ կյանք: Այս մասին Երևանում Ազատության հրապարակում կուսակցության հանրահավաքին ասաց ԲՀԿ-ի նախընտրական ցուցակի երրորդ համար Իվետա Տոնոյանը:
«Մեր հայրենիքում տեղի են ունենալու ընտրություններ, և մեր ժողովուրդն իր որոշիչ քվեով պետք է որոշի, թե ինչ ապագա է ունենալու մեր երկիրն առաջիկա տարիների համար: Այս ընտրությունները պարզապես խորհրդարանական ընտրություններ չեն: Այս ընտրությունները հայրենիք ունենալու և չունենալու ընտրություններ են: Եվ մենք բոլորս պետք է քվեարկենք՝ հանուն բարգավաճ Հայաստան ունենալու գաղափարի»,-ասաց Տոնոյանը:
Նա շեշտեց՝ ԲՀԿ-ն մշտապես հանդես է եկել խոսքի ու գործի համապատասխանության դիրքերից՝ հավելելով, որ Գագիկ Ծառուկյանը երբևէ չի տվել խոստում, որն իրականություն չի դարձրել: «Ինչպես ասում է ԲՀԿ նախագահ Գագիկ Ծառուկյանը՝ եկել է մեր ժամանակը»,-ասաց Տոնոյանը:
Նա խոսեց սահմանային խնդիրներից՝ նշելով, որ 10 օր շարունակ իրենք եղել են գրեթե բոլոր մարզերում: «Բոլոր համայնքներում մարդկանց աչքերում տեսել ենք տագնապ, վախ, անհանգստություն՝ իրենց, իրենց երեխայի ապագայի հետ կապված: «Բարգավաճ Հայաստան» կուսակցությունն ասում է՝ մեզ տալով ձեր վստահության քվեն, ձեր երեխաների ապագան լինելու է անվտանգ, հզոր, ՀՀ-ն լինելու է զարգացող և բարեկեցիկ կյանքով ապրող»,-ասաց նա:
Գագիկ Ծառուկյանը վստահեցրեց՝ իր նպատակը, ցանկությունն է կարողանալ պիտանի, օգտակար լինել հայրենիքին, ժողովրդին հանել այս վիճակից: «Այսօր շատ ծանր վիճակում ենք: Առաջնայինը պետք է կարողանանք ապահովել մեր հայրենիքի անվտանգությունը»,-ասաց նա:
Ծառուկյանը կրկին շեշտեց Ռուսաստանի հետ նոր ռազմաքաղաքական փաստաթուղթ ստորագրելու անհրաժեշտությունը:
«Իրազեկ քաղաքացիների միավորումը» աերոնկարահանման միջոցով իրականացրել է հանրահավաքի մասնակիցների հաշվարկ, որի արդյունքում պարզվել է, որ 19:33-ի դրությամբ Ազատության հրապարակում է գտնվել մոտ 4600 մարդ։ Հաշվարկն իրականացվել է մասնակիցների անհատական հաշվարկի միջոցով։ Հարկ է նշել, որ հաշվարկում ներառված չեն ծառերի տակ արևից պատսպարված քաղաքացիները, որոնք չեն երևում դրոնով արված աերոլուսանկարում: Լուսանկարը բարձր որակով հասանելի է այստեղ։ Հաշվարկը ստուգելու նպատակով մարդկանց անհատականացնող կետերով նկարը կարելի է ներբեռնել այստեղից։
