Ֆրանսիայի նախագահ Էմանյուէլ Մակրոնն ասել է, որ իր երկիրը փաստեր ունի, որոնք վկայում են Լեռնային Ղարաբաղի ռազմական գործողություններին Թուրքիայից ժամանած սիրիացի իսլամիստների մասնակցության մասին:
«Մենք հստակ տեղեկատվություն ունենք, որը վկայում այն մասին, որ սիրիական գրոհայինները թողել են մարտի դաշտը Ղազիանթեփում, որպեսզի միանան Լեռնային Ղարաբաղի մարտերին: Սա շատ լուրջ է եւ մենք սա քննարկելու ենք այսօրվա Եվրամիության գագաթնաժողովում», - ասել է Ֆրանսիայի նախագահը:
Մակրոնը նաեւ ասել է, որ Ֆրանսիան անում է «ամեն հնարավորը» վիրավոր ֆրանսիացի լրագրողների Ղարաբաղից տեղափոխելու համար:
Սեպտեմբերի 30-ին Ռուսաստանն էր անհանգստություն հայտնել Սիրիայից եւ Լիբիայից ղարաբաղյան հակամարտության գոտի գրոհայինների փոխադրման մասին տեղեկություններով:
«Խորապես մտահոգված ենք այս գործընթացներով, որոնք ոչ միայն նպաստում են լարվածության աճին տարածաշրջանում, այլեւ երկարաժամկետ անվտանգության սպառնալիքներ են ստեղծում տարածաշրջանի բոլոր երկրների համար:
Կոչ ենք անում շահագրգիռ պետությունների ղեկավարներին գործուն քայլեր ձեռնարկել օտարերկրյա ահաբեկիչների եւ վարձկանների մասնակցությունը հակամարտությունում թուլ չտալու եւ տարածաշրջանից նրանց անհապաղ հեռացման համար», - ասված էր Ռուսաստանի ԱԳՆ մեկնաբանության մեջ:
