Այս հակամարտությունում երրորդ երկրի ցանկացած մասնակցություն կարող է ունենալ բացասական հետևանք: Նման տեսակետ է հայտնել ՌԴ նախագահի մամուլի քարտուղար Դմիտրի Պեսկովը՝ գրում է РИА Новости-ն:
«Կարծում ենք՝ կողմերից մեկին հավանական ռազմական աջակցություն ցույց տալու վերաբերյալ հայտարարությունը լարվածության հետագա սրման գործում ամենայն հավանականությամբ կրում է սադրիչ բնույթ: Մենք կարծում ենք, որ այսօր նման հայտարարությունները շատ վնասակար են: Եվ, իհարկե, մեր կարծիքով, այս հակամարտությունում երրորդ երկրի ցանկացած մասնակցություն կարող է ունենալ բացասական հետևանք»,- հայտարարել է Դմիտրի Պեսկովը:
Նշենք, որ ավելի վաղ ՌԴ նախագահի մամուլի խոսնակ Դմիտրի Պեսկովի խոսքերից հայտնի դարձավ, որ ՌԴ նախագահ Վլադիմիր Պուտինը ՌԴ անվտանգության խորհրդի մշտական անդամների հետ խորհրդակցության ժամանակ հայտարարել է Լեռնային Ղարաբաղի հիմնահարցի վերաբերյալ Ռուսաստանի, ԱՄՆ-ի ու Ֆրանսիայի նախագահների համատեղ հայտարարություն նախապատրաստելու մասին: Այդ մասին հայտնում էր ТАСС գործակալությունը:
Պեսկովը հայտնել է նաև, որ խորհրդակցության ժամանակ քննարկվել են Լեռնային Ղարաբաղի հակամարտության գոտում վերջին իրադարձությունները: Մասնակիցներն իրենց անհանգստությունն են հայտնել շարունակական ռազմական գործողությունների վերաբերյալ:
