Նոյեմբերի 22-30-ը ընթանում է Chess24.com կայքի կազմակերպած արագ շախմատի Skilling Open առցանց մրցաշարը, որին մասնակցում է նաև Հայաստանի առաջատար շախմատիստ Լևոն Արոնյանը: Մրցաշարի մրցանակային ֆոնդը 100 000 եվրո է, հաղթողը ստանալու է 30 000 եվրո:
Մրցաշարին մասնակցում են աշխարհի լավագույն շախմատիստներից 16-ը: Առաջին երեք օրերը մրցաշարն ընթացավ շրջանաձև մրցակարգով. յուրաքանչյուր շախմատիստ մրցակցի հետ անցկացրեց մեկական պարտիա: Դրանց արդյունքներով լավագույն 8 շախմատիստները պայքարը շարունակելու են փլեյ-օֆֆ փուլում:
Արոնյանը, որի արագ շախմատի վարկանիշը մրցաշարում 6-րդն է (2778) շրջանաձև մրցաշարը բավականին լավ սկսեց. առաջին օրը վաստակած 3 միավորով Լևոնը զբաղեցնում էր 6-րդ տեղը: Սակայն երկրորդ օրը հայ շախմատիստն ընդամենը 1.5 միավոր վաստակեց և նահանջեց 11-րդ հորիզոնական: Փոխարենը, Արոնյանը գերազանց անցկացրեց մրցաշարի երրորդ օրը՝ 5 հնարավորից վաստակելով 4 միավոր: Դա թույլ տվեց նրան վաստակած 8.5 միավորով բարձրանալ աղյուսակի 3-5-րդ հորիզոնականներ և ապահովել իր տեղը փլեյ-օֆֆ փուլում: Լրացուցիչ ցուցանիշներով Լևոնը 5-րդն էր, ընդ որում միայն կես միավորով հետ մնաց առաջին տեղը կիսած Մագնուս Կառլսենից և Հիկարու Նակամուրայից:
Այժմ, քառորդ եզրափակիչում Արոնյանը կհանդիպի շրջանաձև մրցաշարում 4-րդ տեղը զբաղեցրած ռուս Յան Նեպոմնյաշչու հետ: Օրեր առաջ այս երկու շախմատիստներն արդեն հանդիպել էին Chess.com կայքի կազմակերպած շախմատի առցանց աշխարհի առաջնության 1/8 եզրափակչում, և այդ անգամ հաջողությունն ուղեկցել էր Արոնյանին: Հետաքրիքր է, որ երկու շախմատիստների արագ շախմատի վարկանիշը նույնն է՝ 2778:
Նոկաուտ փուլում մրցամարտերը բաղկացած են լինելու երկու փուլից, որից յուրաքանչյուրում շախմատիստները միմյանց հետ 4-ական պարտիա են անցկացրել արագ շախմատի կանոններով (15 րոպե + 10 վայրկյան յուրաքանչյուր քայլի համար): Հավասար արդյունքի դեպքում երկու պարտիա կանցկացվի կայծակնային շախմատի կանոններով (5+3), դրա հավասարության դեպքում էլ մեկ պարտիա՝ արմագեդոնի կանոններով (5 րոպե սպիտակներին, 4 րոպե սևերին, սպիտակները պարտավոր են հաղթել):
Քառորդ եզրափակչի մյուս զույգերը կազմել են Մագնուս Կառլսենն ու Անիշ Գիրին, Հիկարու Նակամուրան ու Մաքսիմ Վաշյե-Լագրավը, Ուեսլի Սոն ու Թեյմուր Ռաջաբովը:
Հիշեցնենք, որ այս օրերին Արոնյանը մասնակցում է նաև նոյեմբերի 1-ից դեկտեմբերի 13-ը ընթացող chess.com կայքի կազմակերպած արագ շախմատի աշխարհի առցանց առաջնությանը, որտեղ ևս դուրս է եկել քառորդ եզրափակիչ ու պետք է հանդիպի ֆրանսիացի Մաքսիմ Վաշյե-Լագրավին: Մրցամարտի օրը դեռ հայտնի չէ:
