Լրագրողին հավատարմագրած պետական մարմնին հնարավորություն կտրվի դադարեցնելու լրագրողի հավատարմագրումը, եթե վերջինս խախտի այդ կառույցի աշխատանքային գոտում գործող կարգապահական կանոնները: Ըստ նախագծի հիմնավորման՝ ներկա օրենսդրությամբ պետական կառույցը սահմանում է լրագրողի հավատարմագրումը դադարեցնելու հիմքերը, սակայն գործնականում չի կարող այդ հիմքերի դեպքում որեւէ կերպ դադարեցնել լրագրողի հավատարմագրումը: Դրա համար անհրաժեշտ է հավատարմագրման ներկայացրած լրատվական գործունեություն իրականացնողի դիմումը:
«Զանգվածային լրատվության մասին» օրենքում լրացում են առաջարկում «Քաղաքացիական պայմանագիր» խմբակցության պատգամավորներ Արթուր Հովհաննիսյանը եւ Լիլիթ Մինասյանը:
Լրագրողական կազմակերպությունների գնահատմամբ՝ այս փոփոխությունն ազատ խոսքը լռեցնելու, լրագրողների գործունեությունը սահմանափակելու նպատակ ունի:
Վերոնշյալ օրենսդրական առաջարկը քննարկելու նպատակով ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանն ապրիլի 15-ին հանդիպել է լրագրողական հանրույթի ներկայացուցիչների հետ: Նա նշել է, որ քննարկմանը չեն մասնակցում խորհրդարանական խմբակցությունների ներկայացուցիչները եւ օրինագծի հեղինակները, թեպետ մասնակցության հրավեր եղել է: Թագուհի Թովմասյանը մտահոգիչ է համարել, որ լրագրողական կազմակերպությունների հետ խնդիրը չի քննարկվել:
Հայաստանի ժուռնալիստների միության նախագահ Սաթիկ Սեյրանյանի համոզմամբ՝ այդ փոփոխությամբ պետական մարմինները կարող են կամայական որոշումներ կայացնել: Նրա կարծիքով՝ նախագծում պետք է հստակ սահմանվեն հավատարմագրման հիմքերը, որ լրագրողի համար իր վարքագիծը կանխատեսելի լինի եւ իմանա, թե որ դեպքում կարող է զրկվել հավատարմագրումից:
Խոսքի ազատության պաշտպանության կոմիտեի նախագահ Աշոտ Մելիքյանի համոզմամբ՝ սա իրականացվող փուլային գործընթացի մի մասն է: Նա հավելել է, որ առաջարկվող կարգավորումը որեւէ աղերս չունի միջազգային մոտեցումների հետ: Աշոտ Մելիքյանը կարծիք է հայտնել, որ հավատարմագրումից զրկում կամ դադարեցում չպետք է լինի մեր օրենսդրության մեջ:
Խոսելով պետական մարմինների գործունեության սկզբունքային տարբերությունների մասին՝ Երեւանի մամուլի ակումբի նախագահ Բորիս Նավասարդյանը նշել է, որ հավատարմագրումը նպատակահարմար է միայն Ազգային ժողովում՝ հաշվի առնելով այդ կառույցի գործունեության առանձնահատկությունները, հատուկ պահպանման ռեժիմը: Զեկուցողը կարեւորել է ԱԺ հավատարմագրման կարգում ինքնակարգավորման մեխանիզմների ներառումը, աշխատակազմի եւ լրագրողների երկխոսությունը: Նշվել է, որ հավատարմագրված լրագրողներն իրենց շարքերից պետք է ընտրեն կարգի խախտման հարցերով զբաղվող մարմին: Նա հավելել է, որ կարգը պահպանելու պարտավորություններ պետք է ունենան ոչ միայն լրագրողները, այլ նաեւ՝ պատգամավորները եւ կարծիք հայտնել, որ պետք է լուծվի Ազգային ժողովում էթիկայի հանձնաժողովի գործունեության հարցը:
Լրատվամիջոցների խմբագիրներն ու ներկայացուցիչներն իրենց մտահոգություններն են հայտնել օրինագծի կարգավորումների առնչությամբ, կարեւորել մասնագիտական կազմակերպությունների հետ հարցի մանրամասն քննարկումը: Կարծիք է հնչել, որ կարգավորումը չի համապատասխանում Սահմանադրության դրույթներին եւ հակասում է մեր երկրի վավերացրած միջազգային պարտավորություններին: Օրենսդրական խնդիրների լուծման համատեքստում կարեւորվել է լրագրողական կազմակերպությունների եւ պետական կառույցների արդյունավետ համագործակցությունը: Անդրադարձ է եղել հավատարմագրման ներկա գործընթացի արդյունավետության հարցին:
Եզրափակիչ ելույթում հանձնաժողովի նախագահ Թագուհի Թովմասյանը կարեւորել է էթիկայի նորմերի երկկողմ պահպանումը եւ տեղեկացրել, որ նախաձեռնել է Էթիկայի հանձնաժողովի ձեւավորման գործընթաց: Նրա գնահատմամբ՝ յուրաքանչյուր խմբագրություն պետք է մշակի եւ հրապարակի էթիկայի այն կանոնները, որոնց հենց ինքն է հետեւելու: «Սա ինքնակարգավորման լավագույն միջոցն է»,-ասել է հանձնաժողովի նախագահը:
Թագուհի Թովմասյանն առաջարկել է ստորագրահավաք կազմակերպել, դիմել հեղինակներին՝ խնդրելով հետ վերցնել նախագիծը, ինչպես նաեւ դիմել Կառավարությանը՝ բացասական եզրակացության խնդրանքով: Հանձնաժողովի նախագահի համոզմամբ՝ քննարկումների արդյունքում պետք է գտնել երկու կողմի համար ընդունելի տարբերակ:
