ՀՀ երրորդ նախագահ Սերժ Սարգսյանն այսօր նույնպես Հանրապետության հրապարակից մասնակցելու է Հայոց ցեղասպանության նահատակների հիշատակի ոգեկոչմանը նվիրված ամենամյա Ջահերով երթին: Այս մասին լրատվամիջոցների հետ զրույցում տեղեկացրել է ՀՀԿ փոխնախագահ Արմեն Աշոտյանը: Երթն այս տարի անցկացվելու է «Տեր ենք Արցախին» կարգախոսով: Հիշեցնենք, ավելի վաղ Ռոբերտ Քոչարյանի գրասենյակից տեղեկացրել էին, որ վերջինս ևս մասնակցելու է Ջահերով երթին:
Այս տարի ջահերով երթը մեկնարկելու է ապրիլի 23-ին՝ ժամը 19։15-ին, Հանրապետության հրապարակից։ Երթի մասնակիցները շարժվելու են դեպի Ծիծեռնակաբերդի բարձունք։ Հիշեցնենք, որ այս տարի ջահերով երթը տարբերվելու է նախորդ տարիներից։ Այս անգամ երթի մասնակիցները հուշահամալիր բարձրանալուց հետո չեն իջնելու, գիշերելու են այնտես։
Հավելենք, որ ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը Ֆեյսբուք սոցիալական ցանցով կոչ է արել գալ Հանրապետության Հրապարակ և մասնակցել ջահերով երթին դեպի Ծիծեռնակաբերդ, եթե "դեմ են Հայաստանի ու Արցախի թրքացմանը, կողմ են ուժեղ Հայաստան և Արցախ ունենալուն, միասին ցույց տալու արտաքին և ներքին թշնամուն, որ հայ ազգը չի հանձնվելու":
Նշենք, որ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանն իր հերթին, այսօր՝ ժամը 18:00-ին, հրավիրում է Ազատության հրապարակ՝ ամփոփելու մեկ շաբաթվա ակցիան:
