Ապրիլի 1-ին ՀՀ ԱԺ Հայաստան-Մեծ Բրիտանիա բարեկամական խմբի անդամները՝ Էդուարդ Աղաջանյանի ղեկավարությամբ, հանդիպել են ՄԹ խորհրդարանի ՄԹ-ՀՀ բարեկամական խմբի ղեկավար Թիմ Լոութընի գլխավորած պատվիրակության անդամների հետ:

Էդուարդ Աղաջանյանը, ողջունելով հյուրերին խորհրդարանում, կարևորել է պատվիրակության այցը Հայաստանի և Արցախի համար այս դժվարին ժամանակահատվածում:

«2022 թվականի հունվարի 20-ին Հայաստանը և Միացյալ Թագավորությունը նշել են դիվանագիտական հարաբերությունների հաստատման 30-ամյակը: Հայաստանը մեծապես արժևորում է Միացյալ Թագավորության հետ երկկողմ բարեկամական հարաբերությունների կայուն զարգացումը: Առկա փոխադարձ հարգանքի և վստահության մթնոլորտը` հիմնված ընդհանուր արժեքների վրա, ամուր հիմք է համագործակցության հետագա զարգացման և եղած ներուժի համակողմանի օգտագործման համար»,- ասել է Էդուարդ Աղաջանյանը:

Թիմ Լոութընը շնորհակալություն է հայտնել ջերմ ընդունելության համար` նշելով, որ այցի ծրագիրը բավականին հագեցած է: Նա իր պատրաստակամությունն է հայտնել` աջակցելու երկու պետությունների միջև հարաբերությունների ամրապնդմանը:

Էդուարդ Աղաջանյանը կարևորել է երկու երկրների միջև միջխորհրդարանական կապերի հետագա ընդլայնումն ու ամրապնդումը` նշելով, որ այս այցը նոր ազդակ կհանդիսանա խմբերի գործունեության աշխուժացման համար և հնարավորություն կընձեռի քննարկելու փոխադարձ հետաքրքրություն ներկայացնող բազմաթիվ հարցեր:

Կարևորվել է նաև երկու երկրների խորհրդարանների ներկայացուցիչների համագործակցությունը միջազգային խորհրդարանական հարթակներում:

Խոսելով Լեռնային Ղարաբաղի հիմնախնդրի, ստեղծված իրավիճակի մասին` Թիմ Լոութընը նշել է, որ պետք է բանակցել հարցի կարգավորման շուրջ: Անդրադարձ է կատարվել նաև մշակութային ժառանգության պահպանության խնդրին:

Հայ խորհրդարանականներն իրենց երախտիքի խոսքն են հղել բարոնուհի Քերոլայն Քոքսին` հայ ժողովրդի կողքին լինելու, ինչպես նաև Արցախի հանդեպ հոգատար ու սրտացավ վերաբերմունքի համար:

Հայաստանում գտնվող ՄԹ խորհրդարանի Մեծ Բրիտանիա-ՀՀ բարեկամական խմբի ղեկավար Թիմ Լոութընի գլխավորած պատվիրակության անդամներն ապրիլի 1-ին ՀՀ ԱԺ արտաքին հարաբերությունների մշտական հանձնաժողովի նախագահ, ՀՀ ԱԺ Հայաստան-Մեծ Բրիտանիա բարեկամական խմբի ղեկավար Էդուարդ Աղաջանյանի ու ԱԺ պատգամավոր Մարիամ Պողոսյանի ուղեկցությամբ այցելել են Ծիծեռնակաբերդի հուշահամալիր:

Հյուրերը ծաղիկներ են դրել Հայոց ցեղասպանության զոհերի հիշատակը հավերժացնող անմար կրակի մոտ: Հայոց ցեղասպանության թանգարան-ինստիտուտում ծանոթանալով ցեղասպանությունը փաստող ցուցանմուշներին` գրառում են կատարել Պատվավոր հյուրերի հուշամատյանում:

ՄԹ խորհրդարանի Մեծ Բրիտանիա-ՀՀ բարեկամական խմբի ղեկավար Թիմ Լոութընը նշել է. «Մենք երբեք չպետք է մոռանանք պատմության դասերը: Այսպիսի վայրերը մեզ հիշեցնում են, որ պետք է աչալուրջ լինենք մեր շուրջը կատարվող իրադարձությունների նկատմամբ: Մեծապես գնահատում եմ մեր այցը: Սա շատ յուրահատուկ վայր է»:

Մեծ Բրիտանիայի և Հյուսիսային Իռլանդիայի Միացյալ Թագավորության խորհրդարանի Լորդերի պալատի անդամ, հայ ժողովրդի մեծ բարեկամ, բարոնուհի Քերոլայն Քոքսը հայերենով ողջունել է բոլորին և նշել. «Շատ ուրախ եմ, որ նորից այստեղ եմ, որ այս պատմական երկրում հանդիպում եմ հրաշալի մարդկանց: Ուրախ եմ Մեծ Բրիտանիայի Լորդերի և Համայնքների պալատների ներկայացուցիչների հետ այստեղ լինել: Մենք կփորձենք լինել ձեր ձայնը:

Հույս ունեմ, որ մենք կկարողանանք Մեծ Բրիտանիայի արտաքին քաղաքականությամբ աջակից լինել ձեր իրավիճակին: Ես խորապես ցավում եմ, որ ձեր ժողովուրդը տառապում է` հատկապես Արցախում: Մենք հարգում ենք ձեզ: Ես միշտ շնորհակալություն եմ հայտնում ձեզ` ազատության սահմանագիծը պահելու համար»: