Հայաստանում ազգային փոքրամասնությունների ներկայացուցիչները կոչ են անում միջազգային հանրությանը ճանաչել և դատապարտել Հայոց ցեղասպանությունը:
Հայաստանի հրեական համայնքի նախագահ Ռիմա Վարժապետյանի խոսքով՝ այն ինչ չի ճանաչվել, կրկնվում է: «Մենք դիմում ենք ամբողջ աշխարհին, մասնավորապես, այն պետություններին, որոնք մինչ այսօր չեն ճանաչել Հայոց ցեղասպանությունը: Հայոց ցեղասպանությունը պետք է ճանաչել և դատապարտել, որպեսզի այն այլևս երբեք չկրկնվի»,- լրագրողների հետ ճեպազրույցում ասաց նա:
Եզդիների ազգային միության նախագահ Խդր Հաջոյանն էլ յուրաքանչյուրի պարտքն է համարում հարգանքի տուրք մատուցելը անմեղ զոհերի հիշատակին: Նա նաև յուրաքանչյուրի պարտքն է համարում միջազգային հանրությանը ևս մեկ անգամ կոչ անել, որպեսզի ստիպեն Թուրքիային հրաժարվել ժխտողական քաղաքականությունից: «Ցեղապանության չդատապարտումը ծնում է նոր հանցագործություններ»,-հավելեց նա
«Քուրդիստան» կոմիտեի համանախագահ Սլո Դրբոյանն էլ նշեց, որ գերտերությունների կողմից պետք է դատապարտվի հայերի, քրդերի, ասորիների նկատմամբ վարած քաղաքականությունը: «Մենք մեր սխալներից դեռ դասեր չենք քաղել: Թուրքական ֆաշիստական ռեժիմը քուրդ ժողովրդի հանդեպ բնաջնջման քաղաքականություն է որդեգրել, իսկ մենք ուզում ենք մեր իրավունքների տերը դառնալ»,-հավելեց նա:
