Հայաստանի Հանրապետության նախագահ Վահագն Խաչատուրյանը շնորհավորական ուղերձ է հղել Ֆինլանդիայի նախագահ Սաուլի Նիինիստյոյին՝ Հայաստանի և Ֆինլանդիայի միջև դիվանագիտական հարաբերությունների հաստատման 30-րդ տարեդարձի առթիվ։
Ուղերձում մասնավորապես ասվում է. «Այս հոբելյանը կարևոր առիթ է՝ արժևորելու 30 տարի առաջ՝ մարտի 25-ին, մեր երկրների միջև սկիզբ դրված միջպետական համագործակցությունը՝ խարսխված ընդհանուր արժեքների, տասնամյակների վստահության և փոխադարձ հարգանքի վրա, և ուրվագծելու համագործակցության նոր հեռանկարները։
Լիահույս եմ, որ համատեղ ջանքերով մեզ կհաջողվի ամրապնդել ու ընդլայնել հայ-ֆիննական հարաբերությունների օրակարգը երկկողմ և բազմակողմ, ինչպես նաև ՀՀ-ԵՄ համապարփակ և ընդլայնված գործընկերության համաձայնագրի շրջանակներում՝ ի նպաստ մեր ժողովուրդների և պետությունների բարօրության»։
Հայաստանի Հանրապետության նախագահ Վահագն Խաչատուրյանը շնորհավորական ուղերձ է հղել Հունաստանի Հանրապետության նախագահ Կատերինա Սակելլարոպուլուին երկրի ազգային տոնի՝ Անկախության օրվա առթիվ:
Ուղերձում մասնավորապես ասվում է. «Գոհունակությամբ պետք է փաստել, որ հայ-հունական հարաբերությունների հիմքում մեր ժողովուրդների դարավոր ամուր բարեկամական կապերն են, որոնք շարունակում են զարգանալ փոխըմբռնման մթնոլորտում։
Հայաստանը և Հունաստանը մշտապես հանձնառու են՝ ընդլայնելու և խորացնելու փոխշահավետ գործակցությունն ինչպես երկկողմ, այնպես էլ բազմակողմ հարթակներում։
Վստահ եմ, որ համատեղ ջանքերով մեր երկրների միջև առկա ջերմ բարեկամական հարաբերությունները և արդյունավետ համագործակցությունը հետագայում առավել կզարգանան և կամրապնդվեն ի շահ մեր ժողովուրդների»:
