Հայաստանի Հանրապետության էկոնոմիկայի նախարար Վահան Քերոբյանն ու նախարարի տեղակալ Նարեկ Տերյանը կգործուղվեն Ռուսաստանի Դաշնություն: Այս մասին որոշում է ստորագրել ՀՀ վարչապետ Նիկոլ Փաշինյանը:
«Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 5-րդ մասը՝
1. Հայաստանի Հանրապետության էկոնոմիկայի նախարար Վահան Քերոբյանին և Հայաստանի Հանրապետության էկոնոմիկայի նախարարի տեղակալ Նարեկ Տերյանին 2022 թվականի ապրիլի 10-12-ը գործուղել Ռուսաստանի Դաշնություն (Մոսկվա)՝ առևտրատնտեսական համագործակցության հեռանկարները քննարկելու նպատակով։
2. Վահան Քերոբյանի և Նարեկ Տերյանի՝ Ռուսաստանի Դաշնություն (Մոսկվա) գործուղման հետ կապված ծախսերը և «Քովիդ-19» ՊՇՌ նմուշառումների վճարները կատարել Հայաստանի Հանրապետության 2022 թվականի պետական բյուջեով արտասահմանյան պաշտոնական գործուղումների համար նախատեսված միջոցների հաշվին:
3. Հայաստանի Հանրապետության էկոնոմիկայի նախարարին՝ գործուղումից վերադառնալուց հետո եռօրյա ժամկետում Ռուսաստանի Դաշնություն գործուղման արդյունքների մասին հաշվետվությունը ներկայացնել Հայաստանի Հանրապետության վարչապետի աշխատակազմ և Հայաստանի Հանրապետության արտաքին գործերի նախարարություն»,- ասված է որոշման մեջ:
Հիշեցնենք, որ կառավարության ապրիլի 7-ի նիստին հաջորդած ճեպազրույցում ՀՀ էկոնոմիկայի նախարար Վահան Քերոբյանը հայտնել էր, որ տեղյակ է Հայաստանում կերային կուլտուրաների խնդրից և տեղեկացրել էր, որ առաջիկայում մեկնելու է ՌԴ, որտեղ փորձելու է առարկայական լուծումներ գտնել:
«Այդ խնդիրը կա և այն մեզ ևս շատ անհանգստացնում է: Ինչպես գիտեք մեր կերային կուլտուրաները ներմուծվում են հիմնականում Ռուսաստանից: Այս պահին խնդրին միջանկյալ լուծումներ տրված են, սակայն մյուս շաբաթ մեկնելու եմ ՌԴ, որտեղ խնդրին առարկայական լուծումներ կտանք, այնպես կանենք, որ այդ մասով հարցեր չլինեն»,- ասել է Վահան Քերոբյանն՝ անդրադառնալով լրագրողների բարձրացրած այն խնդրին, որ թռչնաբույծները, կերի պակասով պայմանավորված, ստիպված կրճատում են թռչունների գլխաքանակը:
Նախարարն ընդգծել էր, որ այսօր գլխավոր խնդիրը պարենային անվտանգությունն է: Նա կոչ անում գյուղացիներին, որ որքան հնարավոր է ավելի շատ հող մշակել: Նախարարը վստահեցրել էր, որ գյուղացիների արտադրանքը լավ գնով կվաճառվի, որովհետև միջազգային շուկայում առկա է դեֆիցիտ:
