Շնորհակալություն եմ հայտնում Ֆրանսիային` մշտապես հայ ժողովրդի կողքին լինելու եւ աջակցելու համար. նշել է Ազգային ժողովի Հայաստան-Ֆրանսիա բերակամական խմբի ղեկավար Վլադիմիր Վարդանյանը մեր երկրում Ֆրանսիայի Հանրապետության արտակարգ եւ լիազոր դեսպան Անն Լույոյի հետ մայիսի 24-ին կայացած հանդիպման ընթացքում:
Հանդիպմանը ներկա է եղել ԱԺ Հայաստան-Ֆրանսիա բարեկամական խմբի անդամ Ռուստամ Բաքոյանը:
Անդրադառնալով երկկողմ կապերին` կողմերը փաստել են, որ Հայաստանի եւ Ֆրանսիայի խորհրդարանների միջեւ համագործակցությունը բարձր մակարդակի վրա է:
Որպես ԱԺ Հայաստան-Ֆրանսիա բարեկամական խմբի ղեկավար` Վլադիմիր Վարդանյանը խմբերի միջեւ արդյունավետ համագործակցությունը խորացնելու պատրաստակամություն է հայտնել:
Զրուցակիցներն ընդգծել են Ֆրանսիայում հայ համայնքի առանցքային դերակատարությունը, նշել, որ այն յուրահատուկ կամուրջ է հայ-ֆրանսիական բազմաբեւեռ գործակցության հարցում:
Դեսպանը եւս կարեւորել է միջխորհրդարանական համագործակցության ընդլայնումը, այդ հարցում ընդգծել բարեկամական խմբերի սերտ փոխգործակցությունը:
Կարեւորվել է Արցախի խնդրի կարգավորումը եւ տարածաշրջանում խաղաղության ու կայունության հաստատումը:
