«Զարգացած, խելացի երիտասարդներով, պետականամետ մտածողությամբ քաղաքացիներով, բաց սահմաններով (նկատի ունեմ՝ ցամաքային, օդային), որպես հարգանքի արժանի միջազգային իրավունքի սուբյեկտ: Ես հավատում եմ, որ պայծառ ապագա ենք ունենալու, որովհետեւ հավատում եմ մեր հավաքական ազգային իմաստությանը»,- նշել է ՀՀ ԱԺ «Քաղաքացիական պայմանագիր» խմբակցության պատգամավոր Հերիքնազ Տիգրանյանը՝ արձագանքելով ուսանողի այն հարցին, թե ինչպիսին կուզենար տեսնել ՀՀ-ն 30 տարի հետո:
Ճանաչողական այցի շրջանակում Ազգային ժողով են այցելել Արմավիրի տարածաշրջանային պետական քոլեջի, Արմավիրի պետական ինդուստրիալ-մանկավարժական քոլեջի, Երեւանի պետական տեխնոլոգիական քոլեջի դասախոսներն ու ուսանողները:
Այցելուները հանդիպել են ՀՀ ԱԺ «Քաղաքացիական պայմանագիր» խմբակցության պատգամավորներ Հերիքնազ Տիգրանյանին եւ Հայկ Ցիրունյանին:
Աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը հյուրերին ներկայացրել է Ազգային ժողովի կառուցվածքը, անդրադարձել է մշտական հանձնաժողովների գործունեության ընթացակարգին, ներկայացրել պատգամավորի աշխատակարգը:
Դասախոսներից մեկի այն դիտարկմանը, թե միջին մասնագիտական կրթություն ստացած ուսանողներն աշխատաշուկայում դժվարությունների են հանդիպում, պատգամավոր Հերիքնազ Տիգրանյանը պատասխանել է, որ ներկայում Աշխատանքի եւ սոցիալական հարցերի նախարարությունն իրականացնում է զբաղվածության երեք ծրագիր: Ծրագրերն ուղղված են աշխատաշուկայում ոչ մրցունակ անձանց աշխատանքի տեղավորմանը: Անմրցունակ են համարվում նաեւ այն մարդիկ, ովքեր չունեն աշխատանքային փորձ:
Դասախոսների եւ ուսանողների հարցերը հիմնականում վերաբերել են միջին մասնագիտական կրթության մարտահրավերներին, սոցիալական փաթեթներին, համայնքների խոշորացմանը, տնտեսության զարգացմանը, անվտանգության ոլորտին, գյուղատնտեսությանը, ջրային ռեսուրսներին, բանակին, գենդերային հավասարությանը, հայ-ադրբեջանական հարաբերություններին, գնաճին, ռազմական կրթությանը, պարեկային ծառայությանը:
«Ամբողջ աշխարհում գները բարձրացել են COVID-19-ի, պատերազմների պատճառով, որոնց միջով նաեւ մենք ենք անցել: Նման իրավիճակը նաեւ համաշխարհային տնտեսությամբ է պայմանավորված»,- ասել է ՀՀ ԱԺ «Քաղաքացիական պայմանագիր» խմբակցության պատգամավոր Հայկ Ցիրունյանը՝ արձագանքելով գնաճին վերաբերող ուսանողներից մեկի հնչեցրած հարցին: Միեւնույն ժամանակ, պատգամավորը նկատել է, որ հարեւան երկրների համեմատ, Հայաստանն այդ տեսանկյունից լավ դիրքերում է գտնվում: Հայաստանում փոխարժեքների կտրուկ տատանումներ չեն եղել, գրանցվել է տնտեսական աճ:
Խորհրդարան այցելած հյուրերի օրն ավարտվել է Ազգային ժողովի թանգարան այցով, նրանք ծանոթացել են շենքի պատմությանը, շրջել գրադարանում: