Երևանի քաղաքապետարանը ՄԱԿ-ի զարգացման ծրագրի հետ համատեղ նախաձեռնել է աշխատակիցների վերապատրաստման նոր ծրագիր: Քննարկումներ, դերային խաղեր ու տարբեր իրավիճակներում առաջադրված խնդիրների լուծում. վերապատրաստումն անցկացվում է նոր մոտեցմամբ ու ոչ ֆորմալ ձևաչափով:
«Հաշվի առնելով լրացուցիչ և շարունակական կրթության կարևորությունը կադրային քաղաքականության գործընթացում՝ ցանկացած վերապատրաստում իրականացնելու համար մենք պետք է հասկանանք, թե մեր աշխատակիցները մասնագիտական գիտելիքների և ունակությունների բարելավման ի՞նչ կարիքներ ունեն, այս ամենից ելնելով՝ անհրաժեշտ է իրականացնել վերապատրաստման կարիքների գնահատում: Մեր աշխատանքային գործունեության ընթացքում բոլորս էլ կարող ենք ունենալ ինչ-որ բացեր, որոնք հանդիսանում են խոչընդոտ աշխատանքի բարձր արդյունավետությունն ապահովելու համար: Այս մոտեցումը թույլ կտա ճիշտ վերհանելու, կազմակերպելու և գնահատելու աշխատակիցների մասնագիտական կարողությունները և մոտիվացնել նրանց առ աշխատանք՝ բարձրացնելով արդյունքի ապահովումը: Որպեսզի մենք վերացնենք այդ խոչընդոտները՝ ընտրել ենք վերապատաստման այս ձևաչափը»,- նշել է Երևանի քաղաքապետի խորհրդական Մերի Մարգարյանը:
«Երևանի քաղաքապետարանի հետ ձևավորված հարաբերությունները մեր ամենահաջողված համագործակցություններից է: Ես կարծում եմ, որ ինչպես մյուս բոլոր ծրագրերը, այս նախաձեռնությունը ևս կունենա հաջող ընթացք, կապահովի արդյունքներ և կկրի շարունակական բնույթ»,- նշել է ՄԱԶԾ հանրային քաղաքականության նորարարական ծրագրերի համակարգող Էլեն Սահրադյանը:
Երևանի քաղաքապետարանի աշխատակազմի գնահատման ու վերապատրաստման ծրագրում ընդգրկված է հարյուրից ավելի աշխատակից: