Եվրոպայի խորհրդի Քաղաքական դասընթացների երեւանյան դպրոցի տնօրեն Արմեն Զաքարյանի խոսքով՝ «Ժողովրդավարական քաղաքացիության ուսուցում. Առաջին անգամ ընտրող» ծրագիրն իրականացվել է նախորդ խորհրդարանական ընտրություններին զուգահեռ: Հանրապետության 104 ավագ դպրոցից 50-ն ընդգրկված է այս ծրագրում: Աշխարհագրությունը մեծ է՝ Սյունիք, Կապան, Գորիս, Ջերմուկ, Վայք, Եղեգնաձոր, Գյումրի, Վանաձոր, Դիլիջան: Նախագծի հաղթողներն ապրիլի 29-ին հյուրընկալվել են Ազգային ժողովում: Նախքան ընտրվելը նրանք ուսումնասիրել են գործող Ընտրական օրենգիրքը եւ ընտրախաղի միջոցով պատկերացրել բուն ընտրական գործընթացը:
ՀՀ ԱԺ նախագահ Ալեն Սիմոնյանի հետ հանդիպումից հետո աշակերտները հարցեր են ուղղել նաեւ ՀՀ ԱԺ «Քաղաքացիական պայմանագիր» խմբակցության պատգամավորներ Նարեկ Բաբայանին եւ Ալխաս Ղազարյանին: Աշակերտներից մեկի դիտարկմամբ՝ պատերազմից հետո ամենակարեւոր խնդիրը գերիների եւ անհետ կորածների վերադարձի հարցն է: Աշակերտուհին հետաքրքրվել է, թե ի՞նչ քայլեր են ձեռնարկվում այդ ուղղությամբ: Պատգամավորները նշել են, որ այդ ուղղությամբ օր ու գիշեր աշխատանքներ են տարվում: Ուսուցիչների եւ աշակերտների հարցերը հիմնականում վերաբերել են Հայաստանի եւ Ադրբեջանի միջեւ խաղաղության պայմանագրի կնքմանը, անվտանգության ոլորտին, քաղաքաշինությանը, ուսուցիչների ատեստավորմանը, հեռավար ուսուցմանը, կրթության ոլորտում առկա խնդիրներին:
